Лондоннинг “Арсенал” жамоаси Миланнинг “Интер” клуби марказий ҳимоячиси Алессандро Бастонига жиддий қизиқиш билдирмоқда. Бу ҳақда Football Transfers нашри хабар берди.
Англия клуби раҳбарияти фикрича, жамоа бош мураббийи Микель Артетанинг тактик схемаси кўп жиҳатдан Бастонининг кучли томонларига мос келади. “Интер” 90-100 миллион евродан бошланадиган таклифларни кўриб чиқишга тайёр. Футболчининг Милан клуби билан амалдаги шартномаси 2028 йилнинг ёзига қадар мўлжалланган.
Бастони 2017 йилнинг август ойида 31 миллион евро эвазига “Аталанта”дан “Интер”га ўтган эди. Жорий мавсумда у клуб миқёсида 33 та ўйинда иштирок этиб, 2 та гол ва 6 та самарали узатмани амалга оширган. Transfermarkt портали маълумотларига кўра, ҳимоячининг бозор қиймати 80 миллион еврони ташкил этади.
Аввалроқ Opta статистик портали “Арсенал”нинг АПЛда чемпион бўлиш эҳтимолини 80 фоизга баҳолаган эди. 2-поғонадаги “Манчестер Сити”нинг имкониятлари эса бор-йўғи 16,9 фоизга тенг деб топилган.
Айни пайтда Микель Артета жамоаси АПЛ турнир жадвалида 64 очко билан 1-поғонани банд этган. Лондонликлар “Манчестер Сити”ни 5 очкога ортда қолдирмоқда.
