Англиянинг топ клублари — “Манчестер Сити” ҳамда “Арсенал” Франкфуртнинг “Айнтрахт” жамоасида тўп сураётган ёш ҳимоячи Натаниел Браун трансферига қизиқиш билдирмоқда. Бу ҳақда Cаугҳт Оффсиде нашри хабар берди.
Манбага кўра, 22 ёшли чап қанот ҳимоячисини харид қилиш борасида музокаралар яқин орада бошланиши мумкин. Браун “Айнтрахт” сафида 2024-йилнинг ёзидан буён ҳаракат қилиб келмоқда. Бунга қадар у Германиянинг “Нюремберг” жамоасидан ўйнаган.
Шунингдек, ҳимоячининг атрофидаги вазиятни Англия Премьер Лигасининг бошқа жамоалари, жумладан, “Ньюкасл”, “Астон Вилла” ва “Манчестер Юнайтед” ҳам диққат билан кузатиб бормоқда.
Натаниел Браун Германия У-21 терма жамоаси аъзоси ҳисобланади. Футболчи ҳозирга қадар ушбу жамоа таркибида 14 та ўйинда иштирок этиб, 1 гол муаллифига айланган.
Футболчи жорий мавсум “Айнтрахт” сафида жами 5 та ўйинда майдонга тушиб, ўз ҳисобига 1 гол ва 1 голли узатма ёздириб қўйган. Натаниелнинг клуб билан шартномаси 2030 йил ёзига қадар амал қилади. Transfermarkt портали Брауннинг қийматини 22 миллион еврога баҳоламоқда.
