Украина фронтолди ҳудудларидаги 4 минг километр йўлга дронларга қарши ҳимоя тўрларини ўрнатади. Бу ҳақда мудофаа вазири Михаил Федоров маълум қилди.
Россия масофадан бошқариладиган аппаратлар ёрдамида Украинанинг ҳарбий таъминот йўллари ва фронт ортидаги базаларига тобора чуқурроқ зарба бермоқда. Дронлар шифохоналар, инфратузилма объектлари ва фуқаролик транспортини ҳам нишонга олмоқда.
2025 йилда уларга қарши кўп тўрлар ўрнатилган бўлса-да, уларга эҳтиёж юқорилигича қолмоқда. Федоров ҳимоя чораларини кучайтириш ва Россия дронларига қарши курашиш учун бюджетдан қўшимча 1,6 миллиард гривна (37 миллион доллар) ажратилганини айтди.
Ҳимоя тўрлари дронларнинг парракларини илиб қолади ва уларнинг нишонга — қиммат техника, ҳарбийлар ёки тинч аҳолига — етиб боришига тўсқинлик қилади.
У март ойида кунига 20 километр йўлни ёпишни режалаштираётганини маълум қилди.Атиги бир ой ичида биз тўрларни ўрнатиш тезлигини январь ойидаги кунига 5 километрдан февраль ойида 12 километргача оширдик. Бу ҳарбий логистика хавфсизлигини сезиларли даражада яхшилади ва фронтдаги бўлинмаларнинг барқарор ишлашини таъминлади, деди Федоров.
Шунингдек, Украина Россия билан чегарадош Харьков ва Суми вилоятлари (шимоли-шарқи) ҳамда Чернигов вилоятида (шимоли) мудофаа истеҳкомларини қуришни ҳам тезлаштиради.Йил якунига қадар йўлларда яна 4 минг километрлик дронларга қарши ҳимоя тизимини ўрнатиш ниятидамиз, деди мудофаа вазири.
