Самарқанднинг “Динамо” клуби сардори Анвар Ҳожимирзаев “ҚобилжоновУз” Ёутубе каналига интервью берди. Унда футболга кириб келиши, юрак билан боғлиқ муаммоси сабаб футболдан узоқлашгани, ишлаш учун хорижга кетгани ва қандай қилиб катта футболга қайтгани ҳақида сўзлаб берди.
Футболдаги фаолиятининг бошланиши
“Ҳамма нарсанинг ўз вақт-соати бор. Ёшликдан ният қилганман, демак, шу кунгача насиб қилган экан. 2022 йилда “Қўқон-1912” Пролигага тушиб кетганидан сўнг жамоамиздаги аксарият футболчилар Суперлиганинг бошқа клублари билан шартнома имзолади. Клубни олиб чиқиш бизнинг зиммамизда қолди. Ўша мавсум насиб қилмади, лекин бир йилдан кейин элитага қайтдик. Жамоамизда менга биринчи рақамли ҳужумчи сифатида қарашди ва доимий ўйнашни бошладим. Олдинги мавсумларда ўйин амалиётим кам бўлган. Учрашувларда тўлиқ ҳаракат қилганим ҳисобига голлар ура бошладим ва 16–18 та гол билан Пролига тўпурари бўлдим. Бунда жамоадошларим ва мураббийимизнинг ҳиссаси катта”.
Юракдаги муаммо ва Россия Федерациясида ўтган икки йил
“1994 йилда Наманган вилояти, Косонсой туманида туғилганман. 6-синфда дадам “ИЖ” мототциклида футбол тўгарагига олиб борган, бозордан 3600 сўмга “Интер” либосини олиб берган эди. 2012-йилда Биринчи лига жамоаси — “Косонсойчи”да кўрикдан ўтдим. Бироқ менда юрак билан боғлиқ муаммо бўлган. Даволаниб, 2013 йилда қайта текширувга бордим ва яна шу муаммо билан қайтаришди.
Шундан сўнг 2014–2015 йилларда Россия Федерациясига ишлаш учун кетганман. Калининград шаҳрида бир вақтнинг ўзида ҳам ҳаваскор даражада футбол ўйнаб, ҳам ишлаган эдим. Балки ҳаво сабаби билан юракдаги муаммодан халос бўлганман. Аввал у ерда ҳам текширувдан ўтган эдим, россиялик шифокорлар менга юкламалар мумкин эмаслигини таъкидлаган ва яшашни истасам спорт билан шуғулланмаслигимни айтишганди” дея эслади футболчи.
Футболга қайтиш
“Икки йилдан кейин Косонсойга қайтдим. Қайтганимнинг эртаси куни “Косонсойчи” “Навбаҳор”га қарши ўртоқлик ўйини ўтказиши керак эди. Мураббийлардан жамоа билан машғулот қилиб туришни сўрадим. Ўйиннинг иккинчи таймида майдонга тушдим. Эртаси куни “Навбаҳор” машғулотларига таклиф қилишди. Икки ҳафта жамоа билан машғулот қилдим. Шундан сўнг йиғиннинг иккинчи қисми Тошкентда давом этиши, унга Азизбек Турғунбоевни олиб кетишларини, мени эса кейинги йиғинга олиб боришларини маълум қилишди”.
Суперлигадаги иштирок
“Шу билан яна Россияга кетдим. У ерда устачилик қилардим. Уч ойдан кейин ота-онам бундай юришим яхши эмаслигини, университетга тайёрланиб ўқишим зарурлигини айтиб, уйга чақириб олишди. “Косонсойчи” таркибида машғулот қилишда давом этдим. 2016 йилда Биринчи лига учун клуб сафида рўйхатдан ўтдим. Тиббий кўрик ҳам муаммосиз кечди.
2017 йилда “Хотира-79” жамоасига ўтдим, бир йилдан сўнг Фарғонанинг “Истиқлол” жамоасидан таклиф бўлди. Бу жамоа сафида 2,5 йил фаолият юритдим.
2020 йилда “Навбаҳор” клуби футболчисига айландим. 6 ойлик фаолият давомида деярли ўйин амалиётига эга бўлмадим. 2021 йилда мураббий Бахтиёр Ашурматов “Қўқон-1912”га таклиф қилди. Шундан сўнг Суперлига даражаси, профессионал клуб футболчисининг юкламаларини ҳис қила бошладим. Бу умуман бошқа футбол эди”, дейди Ҳожимирзаев.
Маълумот учун, Анвар Ҳожимирзаев 2024 йилда Ўзбекистон Суперлигасида “Йил кашфиёти” деб топилган ва 10 та гол билан энг яхши ўзбекистонлик тўпурар бўлган. 2025 йил январь ойида илк марта Ўзбекистон миллий терма жамоасига чақирилган ва Иорданияга қарши назорат учрашувида майдонга тушган.
