Бугун, 1 февраль куни Ғазо аҳолисини Миср билан боғловчи Рафаҳ чегара ўтказиш пункти қисман ўз фаолиятини бошлади. Бу ҳақда Исроил Мудофаа вазирлиги ҳузуридаги Фаластин фуқаролик масалаларини мувофиқлаштирувчи CОGАТ идорасига таяниб Middle East Eye нашри маълум қилди.
Қайд этилишича, Рафаҳ пункти тўлиқ фаолият кўрсатмайди. Фақат чекланган аҳолининг чегарани кесиб ўтишига рухсат берилади. Қарор халқаро жамоатчилик, жумладан, гуманитар ташкилотлар томонидан бир неча ойдан буён билдириб келинаётган эътирозлардан сўнг қабул қилинди.
Рафаҳ ўтказиш пункти Исроил Ғазо секторига ҳужум қилиб, камида 31 нафар фаластинликнинг ўлимига сабаб бўлганидан бир кун ўтиб очилди. Бу ўтган йилнинг октябрь ойида жанговар ҳаракатларни тўхтатиш бўйича келишувга эришилганидан сўнг яҳудий давлати сулҳни бузган кўплаб ҳолатлардан бири бўлди.
Рафаҳ ҳақида
Ғазоликлар ва ҳудудга ёрдам етказиб берувчи гуманитар ташкилотлар учун мазкур пункт муҳим аҳамиятга эга. У Исроил анклавга қарши ҳужумларни бошлаган 2023 йил 7 октябрдан сўнг аҳоли ҳаракати учун ёпилди. Исроил армияси ҳудудни тўлиқ эгаллаб олган 2024 йил май ойидан эса фаолиятини бутунлай тўхтатганди.
CОGАТ маълумотига кўра, Рафаҳ орқали кириш ва чиқиш Миср билан мувофиқлаштирилган ҳолда ташкил этилади. Шунингдек, бу учун рухсатнома олиш истагидаги шахслар Исроилнинг хавфсизлик текширувларидан ўтиши керак. Жараённи Европа Иттифоқи миссияси назорат қилади.
Фаластин соғлиқни сақлаш идораси вакилларининг маълум қилишича, тахминан 200 нафар бемор Ғазодан чиқишга рухсат берилишини кутмоқда.
Рафаҳ ўтказиш пунктининг қайта очилиши Ғазони бошқариш учун Дональд Трамп ташаббуси билан тузилган Фаластин технократик қўмитаси фаолиятини бошлашига ҳам йўл очиши мумкин. Бироқ хабарларга кўра, қўмита раҳбари Али Шаат ва унинг делегацияси ҳозирча Ғазога кирмайди. Тузилма аъзоларидан бирининг айтишича, Исроил уларнинг Рафаҳдан ўтишига розилик берган, бироқ аниқ сана белгиланмаган.
