Англия терма жамоаси ва Лондоннинг “Челси” клуби ярим ҳимоячиси Коул Палмер “Манчестер Юнайтед”га ўтмайди. Бу ҳақда The Mirror нашри хабар бермоқда.
Манбага кўра, “қизил иблислар” раҳбарияти Палмер трансферидан воз кечган. Бунга эҳтимолий келишувнинг жуда қимматга тушиши сабаб бўлган. 23 ёшли футболчининг трансфер қиймати ҳозирда 120 миллион еврога баҳоланмоқда. Манкунианликар эса ушбу харид учун катта сумма сарфламоқчи эмас.
Эслатиб ўтамиз, аввалроқ футболчи ўзи туғилиб ўсган Манчестер шаҳрига қайтишни истаётгани ҳақида хабарлар тарқалганди. Бунга Коулнинг исталиялик мутахассис Энцо Маресканинг истеъфога чиқарилгани сабаб бўлган. “Челси”нинг ўзи эса Палмерни жамоанинг “тегиб бўлмас” футболчиларидан бири деб ҳисоблайди. Бироқ унинг ўзи клубнинг амалдаги лойиҳасига шубҳа билан қарамоқда.
Маълумот учун, Палмернинг “Челси” билан амалдаги шартномаси 2033 йил июнь ойининг охиригача мўлжалланган. Футболчи жорий мавсум Англия чемпионатида жами 12 та учрашувда майдонга тушиб, ўз ҳисбоига 4 та гол ёздириб қўйган.
