АҚШ президенти Дональд Трамп Кубага нефть сотадиган ва етказиб берадиган давлатларга бож солишини эълон қилди. Бу ҳақда Оқ уй хабар берди.
Трамп Кубадан келаётган “таҳдид” туфайли фавқулодда ҳолат жорий этди. Унинг сўзларига кўра, фармон “АҚШ миллий хавфсизлиги ва ташқи сиёсатини Куба режимининг ғаразли ҳаракатлари ва сиёсатидан ҳимоя қилиш мақсадида” имзоланган.
“Куба ҳукумати Қўшма Штатларга зарар етказадиган ва хавф соладиган фавқулодда чоралар кўрди. Тузум кўплаб душман мамлакатлар, трансмиллий террористик гуруҳлар ва Қўшма Штатларга қарши фаолият юритувчи ёвуз кучлар, жумладан, Россия ҳукумати, Хитой, Эрон , ҲАМАС ва “Ҳизбуллоҳ” билан ҳамкорлик қилмоқда ҳамда уларни қўллаб-қувватламоқда.
Мисол учун, Куба Қўшма Штатларнинг хавфли рақибларини очиқчасига қабул қилади ва уларга АҚШ миллий хавфсизлигига тўғридан-тўғри таҳдид соладиган мураккаб ҳарбий ва разведка имкониятларини ўз ҳудудида жойлаштириш учун таклиф этади. Кубада Россиянинг хориждаги энг йирик радиоэлектрон разведка маркази жойлашган бўлиб, у АҚШнинг муҳим миллий хавфсизликка оид маълумотларини қўлга киритишга уринмоқда”, деди Трамп.
У имзолаган ҳужжат Кубага нефть етказиб бераётган давлатлардан АҚШга олиб кириладиган маҳсулотларга қўшимча божлар жорий этишга рухсат беради. Тарифлар миқдори эълон қилинмаган.
Трампнинг Кубага таҳдидлари
АҚШ президенти 11 январь куни Куба “узоқ йиллар давомида Венесуэладан катта миқдордаги нефть ва пул эвазига яшаб келгани”ни айтди. У бунинг эвазига Куба 1999–2013-йилларда Венесуэла президенти бўлган Уго Чавес ҳамда ҳозирги раҳбар Николас Мадурони “хавфсизлик хизматлари” билан таъминлаганини айтди. Трамп эндиликда вазият ўзгарганини билдирган.
“Энди Кубага нефть ҳам, пул ҳам келмайди — нол”, деди АҚШ президенти.
Оқ уй раҳбари Куба расмийларига “кеч бўлмасдан АҚШ билан келишув тузишни” қатъий тавсия қилганини айтди. У шундай қилинмаса оқибатлар бўлишидан огоҳлантирди. Бироқ АҚШ президенти айнан қандай келишув назарда тутилаётганини ва Гаванга қандай чоралар қўлланишини очиқламаган. Куба ҳукумати Трампнинг баёнотларига ғазаб билан муносабат билдирди.
“Куба ҳеч қачон ва ҳеч қайси давлатдан хавфсизлик хизматлари эвазига на пул, на моддий мукофот олган”, деди Куба ташқи ишлар вазири Бруно Родригес.
Мамлакат президенти Мигел Диас-Канел эса Куба “эркин, мустақил ва суверен мамлакат” эканини таъкидлади.
“Ҳеч ким бизга нима қилишни буюрмайди. Ҳатто инсон ҳаётини ҳам бизнесга айлантирадиганлар Кубага мутлақо ҳеч нарса буюришга ҳақли эмас”, деган эди у.
АҚШ блокадаси сабаб Кубада атиги 2–3 ҳафтага етадиган нефть захиралари қолди
Қўшма Штатлар томонидан Венесуэлага нисбатан жорий этилган денгиз қамали, шунингдек, Вашингтон томонидан Мексикага кўрсатилаётган босим сабаб Куба нефть ва мазутнинг асосий таъминотчиларидан маҳрум бўлди. Орол давлат мазкур икки ёнилғини асосан электр энергияси ишлаб чиқариш учун ишлатади. Financial Times’нинг Кплер мониторинг платформасига таяниб ёзишича, мамлакатда 2-3 ҳафтага етадиган захира қолган.
Нашр бу хулосага Кубанинг ҳозирги истеъмол даражаси ва чекланган миқдорда қазиб олинадиган маҳаллий нефть ҳажмини ҳисобга олиб келган. Мутахассисларнинг таъкидлашича, Куба иқтисодиёти қулаш арафасида турибди. Нефть ва мазут таъминоти тикланмаса, инқироз фавқулодда даражада чуқурлашиб, сиёсий ҳокимиятнинг мавжудлигини хавф остида қолдириши мумкин.
