Португалиялик ҳужумчи Криштиану Роналду “Ан-Насср” билан амалдаги шартномаси 2027-йилда якунланса ҳам, футболчилик фаолиятини якунлаш ҳақида ўйламаяпти.
Манбаларга кўра, Роналду фаолиятининг кейинги босқичида йирик клублардан бирини сотиб олиш имкониятини кўриб чиқмоқда. Ушбу лойиҳа унинг шахсий бренди ва маркетинг имкониятларини янада кенгайтиришга ёрдам беради. Роналду сотиб олиши мумкин бўлган жамоалар орасида Португалиянинг “Спортинг”, Испаниянинг икки клуби “Валенсия” ҳамда “Хетафе” ҳамда Англиянинг “Манчестер Юнайтед” номи тилга олинмоқда.
Таъкидланишича, португалиялик ҳужумчи Саудия Арабистони валиаҳд шаҳзодаси Муҳаммад бин Салмон кўмагида “Манчестер Юнайтед”ни сотиб олишга ҳаракат қилиб кўради. Агар ушбу режа амалга ошса, ҳужумчи футболчилик карьерасига якун ясайди ва бор эътоборини клубни ривожлантиришга қаратади. Шунингдек, Роналду “Ан-Насср” клубининг катта улушига эгалик қилиши ҳам мумкин. Бу ҳолат футболчининг Саудия Арабистони билан алоқаларини сақлаб қолишга катта ёрдам беради.
Эслатиб ўтамиз, Роналду 2027-йилнинг ёзида футболчилик фаолиятини якунлаши мумкинлиги ҳақида хабар берилган эди. Журналист Бен Жейкобснинг хабар беришича, Роналду ва “Ан-Насср” раҳбарияти футболчининг 2027-йилгача мўлжалланган амалдаги шартномасини узайтиришни режалаштирмаяпти. Мазкур ҳолат унинг қарорига таъсир ўтказиши мумкин.
Маълумот ўрнида, Криштиану Роналду 2023-йилдан бери “Ан-Насср” шарафини ҳимоя қилади. Ҳужумчи жорий мавсум Саудия Арабистони чемпионатида 16 та учрашувда майдонга тушиб, ўз ҳисобига 16 та гол урди ҳамда 1 та голга узатма ёздириб қўйган.
