Мадриднинг “Реал” клуби бош мураббийи Альваро Арбелоа жамоа ҳимоячиси Трент Александер-Арнольдга ўз келажаги ҳақида ўйлаб, клубни тарк этишни тавсия қилган. Бу ҳақда El Nacional нашри хабар берди.
Маълумотларга кўра, Арбелоа Александер-Арнольд билан шахсан учрашиб, вазиятни очиқчасига тушунтирган. У футболчига ёзда бошқа клуб излашни маслаҳат берган. Томонлар ўртасидаги суҳбат давомида Арбелоа инглиз футболчисига узоқ муддатли режаларига уни киритмаганини очиқ айтган. Шунингдек, мураббий Александер-Арнольд оёғидан олган жароҳатидан фориғ бўлиб сафга қайтгач ҳам асосий таркибда мунтазам майдонга тушмаслигини билдирган. Мураббийлар штабининг фикрича, Трент учун босим камроқ бўлган муҳитда ўйнаш фойдалироқ бўлади.
Инглиз ҳимоячисининг ўзи ҳам “Реал”даги фаолияти муваффақиятсиз кечганини тушуниб турибди. Захирада қолишни давом эттириш унинг ҳолатини янада оғирлаштириши мумкин. Шу боис футболчининг атрофидагилар аллақачон бошқа вариантларни ўрганмоқда. “Реал” эса бу масалани имкон қадар тезроқ ёпишни мақсад қилган.
Маълумот учун, Трент Александер-Арнольд “Реал” сафига ўтган ёзда келиб қўшилган. У шу вақтга қадар барча мусобақаларда 11 та учрашувда майдонга тушиб, битта голли узатма амалга оширган. Футболчининг мадридликлар биланшартномаси 2031 йил ёзигача амал қилади. Transfermarkt портали унинг қийматини 70 миллион еврога баҳоламоқда.
