Украинанинг босиб олинган Мариупол шаҳри ҳамда унга туташ ҳудудлар устидан назорат Рамзан Қодировнинг “Ахмат” тузилмаси ихтиёрига топширилиши мумкин. Украина партизанларининг Атеш ҳаракатига кўра, Россия расмийлари бу орқали Чеченистон президентининг садоқатини сақлаб қолмоқчи.
Манбага кўра, сўнгги пайтларда Мариуполда “қодировчилар” сезиларли даражада кўпайган. Бундан мақсад шаҳардаги ресурслар ва иқтисодий объектлар устидан тўлиқ назорат ўрнатиш, шунингдек, босиб олинган ҳудудда Грознийнинг таъсирини кучайтиришдир. Атеш чечен тузилмалари урушда вайрон бўлган шаҳарнинг саноат салоҳияти билан қизиқаётганини таъкидлаган.
Кенг кўламли уруш бошланган 2022-йилга қадар Мариуполнинг “Азовстал” ва “Иллич” металлургия комбинатлари бутун мамлакат пўлат ишлаб чиқаришининг, тахминан, 40 фоизини таъминлаган. Қолаверса, шаҳарда машинасозлик ҳамда хизмат кўрсатиш тармоқлари ҳам ривожланган эди.“Биз форма кийган шахсларнинг жойлашуви ва уларнинг қиммат автомобильлари қатнов йўналишларини мунтазам равишда кузатиб, қайд этиб боряпмиз”, дейилади ҳаракат баёнотида.
Партизанлар ҳаракатига кўра, Россия мулозимларининг бу қарори маҳаллий аҳоли манфаатларига мос келмайди. Қайд этилишича, россияликлар Мариуполни шаҳар эмас, балки ресурслар базаси сифатида кўряпти.
