Чеченистон раҳбари Рамзан Қодиров ва унинг шериклари Илич номидаги Мариупол металлургия комбинатининг замонавий металлургия ускуналарини демонтаж қилиб сотмоқда. Бу ҳақда менежерлар ва қўлга киритилган ҳужжатларга таяниб, The Wall Street Journal хабар берди.
Хабарга кўра, заводдаги металломни Ғарб санкцияларига учраган Россия автомобиль ишлаб чиқарувчилари фойдаланиши учун жўнатишмоқда. Инерт газларни эса Россия космик дастурига узатишмоқда.
Россия Мариуполни назоратга олганидан кўп ўтмай, шошилинч ташкил этилган маҳаллий “Илич номидаги ММК” компанияси ишламаётган заводдан пўлат маҳсулотларини Россияга олиб чиқишни бошлаган. Мазкур компания 2022 йил августда икки шахс номига рўйхатдан ўтказилган, дейилади хабарда.
WSJ маълумотларига кўра, мулкдорлардан бири чеченистонлик тадбиркор Валид Корчагин, иккинчиси эса ҳарбийлар билан алоқадор россиялик тадбиркор Юрий Мурай. У ноқонуний аннексия қилинган Қримга Россия Мудофаа вазирлиги учун юкларни ташиган.
Илич номидаги комбинат урушгача Украинанинг энг йирик корхоналаридан бири эди. Кенг кўламли босқин бошлангач, завод Россия назорати остига ўтди. Маҳаллий аҳолининг хабар беришича, шундан сўнг Қодировнинг шериклари комбинатда металлни “саноат миқёсида” кесиб, сота бошлаган.
