Англиянинг “Челси” клуби собиқ бош мураббийи Энцо Мареска “Реал Мадрид” бош мураббийлиги учун асосий номзодлардан бири ҳисобланади. Италиялик мутахассис “қироллик клуби” томонидан белгиланган мураббийлар рўйхатига киритилган.
Энцо Мареска тактик жиҳатдан замонавий қарашлари ва ёш футболчилар билан олиб бораётган самарали ишлари туфайли мадридликларга маъқул келмоқда. У трансферлар масаласида кескин қарорлар чиқармайдиган, келажакка қаратилган вариант сифатида баҳоланмоқда.
Манбага кўра, “қироллик клуби” учун энг афзал вариант Зинедин Зидан бўлиб қолмоқда. Бироқ франциялик мутахассиснинг “Реал” президенти Флорентино Перес билан муносабатлари яхши эмас. Зидан 2026 йилги Жаҳон чемпионатидан сўнг Франция терма жамоасига мураббий этиб тайинланади.
Шунингдек, “Боруссия Дортмунд” ва “Ливерпуль” собиқ мураббийи Юрген Клопп ҳам асосий вариантлардан бири ҳисобланади. Бироқ Клопп Винисиус Жуниор клубдан кетсагина, “Реал”нинг таклифини қабул қилиши мумкин. Мураббий бразилиялик футболчининг даври якунига етгани ва клуб энди жамоавий ҳамда юқори прессингга асосланган тактикага ўтиши лозим, деб ҳисобламоқда.
Энцо Мареска 2024 йил июлдан 2026 йил январгача “Челси” бош мураббийи лавозимида ишлаган. Унинг бошчилигида Лондон клуби УЕФА Конференциялар Лигаси ва клублар ўртасидаги Жаҳон чемпионати ғолиби бўлган.
