Россиянинг Камчатка ярим оролида сўнгги 30 йил ичидаги кучли қор ёғиши қайд этилди, деб хабар бермоқда “РБК”.
Петропавловск Камчатский шаҳрида қор қоплами айрим жойларда 1,3 метрга етган бўлиб, кўплаб турар жойлар, йўлаклар ва автомобиллар қалин қор остида қолган. Оқибатда шаҳар инфратузилмаси фаолияти кескин издан чиққан.
Мутахассисларнинг маълумотига кўра, кетма-кет келган бир неча циклон ярим оролга жуда кўп ёғингарчилик олиб келган. “Fobos” об-ҳаво маркази етакчи мутахассиси Михаил Леуснинг айтишича, Петропавловск Камчатский да қор баландлиги 51 сантиметрдан 133 сантиметргача етган, қўшни Сосновка қишлоғида эса бу кўрсаткич 163 сантиметрни ташкил этган. Сўнгги бир сутка ичида шаҳарда ойлик ёғингарчилик меъёридан кўпроқ қор ёғган.
Қалин қор сабаб айрим кўп қаватли уйларнинг кириш йўлаклари бутунлай тўсилиб қолган, айримлар уйларини биринчи қават деразалари орқали тарк этишга мажбур бўлган. Вазиятга қутқарувчилар, кўнгиллилар, талабалар бўлинмалари ва ҳарбийлар жалб этилган. Улар уйида қамалиб қолган фуқаролар ҳамда шошилинч тиббий ёрдамга муҳтож бўлганларни эвакуация қилиш билан шуғулланган.
Россия Фавқулодда вазиятлар вазирлиги аҳолини баланд қор уюмларига сакрамаслик ҳақида огоҳлантирди. Идора маълумотига кўра, қор остида автомобиллар, панжаралар ёки ўткир металл буюмлар бўлиши мумкин, бу эса жиддий жароҳатларга олиб келиш хавфини оширади. Шунингдек, қор ичида тиқилиб қолиш эҳтимоли ҳам юқори.
Маҳаллий бошқарув компаниялари томлардан қор кўчиши мумкин бўлган жойларда тўсиқлар ўрнатиб, ҳовли ва йўлакларни тозалаш ишларини олиб бормоқда. Расмийлар ишлар сифатсиз бажарилган тақдирда маъмурий жавобгарлик қўлланишини маълум қилди. “ТАСС” хабарига кўра, шаҳарда қор кўчкиси ва томлардан қор тушиши хавфи бўйича огоҳлантириш тизимлари ишга туширилган.
Петропавловск Камчатский да 15 январдан бошлаб фавқулодда ҳолат режими жорий этилган. Бу қарор томдан қор кўчиши оқибатида икки киши ҳалок бўлганидан сўнг қабул қилинган. Ҳолат юзасидан жиноят иши қўзғатилган. Шаҳар ва вилоят миқёсида қўшимча куч ва техникаларни жалб этиш имконияти яратилган.
Камчатка ўлкаси губернатори Владимир Солодов 16 январь куни магистрал йўллардаги вазият кескин мураккаблашганини маълум қилди. Унинг айтишича, қор тозалаш техникаси ишлашига халақит бераётган йўлларда ташлаб кетилган автомобиллар эвакуация қилинади. Шу сабабли шаҳар бўйлаб жамоат транспорти ҳаракати вақтинча тўхтатилган, аҳолини ташишда “Росгвардия” жалб этилган.
Қор бўрони фонида ҳудуддаги кўплаб муассасалар масофавий иш режимига ўтказилди, айрим мактаб ва коллежлар ёпилди, Вилючинск шаҳрида эса ўқувчилар вақтинча онлайн таълимга ўтказилди. Вилоят прокуратураси циклон оқибатларини бартараф этиш жараёнини назоратга олган, аҳолидан келиб тушган мурожаатлар асосида қарийб 130 та текширув бошланган.
Синоптиклар маълумотига кўра, яқин кунларда циклон чекина бошлайди, бироқ ҳафта охиригача Камчаткада қор кўчкиси хавфи сақланиб қолади. Мутахассислар сайёҳлар ва спортчиларни тоғ ёнбағирларига чиқмасликка, ота-оналарни эса болаларнинг тепаликлар этагида ўйнашига йўл қўймасликка чақирмоқда.
