Испаниянинг “Реал Мадрид” клуби президенти Флорентино Перес жамоани яна португалиялик мутахассис Жозе Моуриньо бошқаришини истамоқда. Бу ҳақда Cope нашри хабар берди.
Ҳозирда Моуриньо Португалиянинг “Бенфика” клуби бош мураббийи сифатида фаолият юритмоқда. Манбага кўра, Перес португалиялик мутахассисга “Бенфика”даги лавозимини тарк этган тақдирда мурожаат қилиши мумкин. Қайд этилишича, “қироллик клуби” президенти Моуриньонинг “Реал”даги фаолиятидан тўлиқ қониқиш ҳосил қилган.
12 январь куни “Реал Мадрид” Хаби Алонсонинг бош мураббийликдан кетганини эълон қилди. Унинг ўрнини Альваро Арбелоа эгаллади. Арбелоа бошчилигидаги илк учрашувда мадридликлар Испания Кубоги 1/8 финали доирасида Сегунда вакили “Альбасете”га сафарда 2:3 ҳисобида мағлуб бўлиб, мусобақани тарк этди. Ла Лигада эса “Реал” 19 турдан сўнг 45 очко билан иккинчи ўринда бормоқда ва пешқадам “Барселона”дан 4 очкога ортда қолмоқда.
Маълумот учун, Жозе Моуриньо 62 ёшда. У 2010–2013 йиллар оралиғида “Реал Мадрид”ни бошқарган ва шу даврда жамоа билан Испания чемпионати, Кубоги ҳамда Суперкубогини қўлга киритган. Моуриньо бошчилигида “қироллик клуби” 178 та учрашув ўтказиб, 127 ғалаба, 28 дуранг ва 23 мағлубият қайд этган. Шунингдек, “Реал” Моуриньо даврида “Барселона”га қарши ўтказилган 17 та “Эл-Класико”нинг 6 тасида ғалаба қозонган, 6 учрашув дуранг билан якунланган, 5 баҳсда эса “кўк-анорранглилар” устун келган.
2025 йил сентябрь ойида Моуриньо Туркиянинг “Фенербаҳче” клубидан Чемпионлар Лигаси асосий босқичига чиқа олмагани сабабли истеъфога чиқарилган. Шундан сўнг португалиялик мутахассис “Бенфика” бош мураббийига тайинланган ва ҳозирда жамоа Португалия чемпионатида учинчи ўринни эгаллаб турибди.
