АҚШ президенти Дональд Трамп 15 январь куни Оқ уйда Венесуэла мухолифати етакчиси Мария Корина Мачадо билан учрашди. Унда Мачадо ўзининг Нобель тинчлик мукофоти медалини Трампга совға сифатида топширди. Бу ҳақда Reuters хабар берди.
Оқ уй расмийси Трамп ушбу медални ўзида олиб қолиш ниятида эканини тасдиқлади. Пайшанба, 15 январь оқшомида Дональд Трамп ижтимоий тармоқдаги саҳифасида учрашув ҳақида шундай ёзди:
“Бугун венесуэлалик Мария Корина Мачадо билан учрашиш мен учун катта шараф бўлди. У кўп қийинчиликларни бошидан ўтказган ажойиб аёл. Мария амалга оширган ишларим учун менга ўзининг тинчлик бўйича Нобель мукофотини тақдим этди. Бу ўзаро ҳурматнинг юксак намунасидир. Раҳмат, Мария!”
Ўз навбатида, Мачадо учрашувни аъло даражада деб баҳолади ва бу совға Трампнинг Венесуэла халқи озодлиги йўлидаги интилишлари эътирофи эканини таъкидлади.
Таъкидлаш жоизки, Мачадо Трампга ўзи олган олтин медални топширган бўлса-да, расман совриндорлик мақоми унинг ўзида қолади. Норвегия Нобель институти мукофотни бошқа шахсга ўтказиш, бўлишиш ёки уни қайтариб олиш имконсиз эканини маълум қилган.
Трамп 2025 йил декабрь ойида Мачадо ушбу мукофот билан тақдирланишидан аввал унга даъвогарлик қилган ва якунда совринсиз қолганидан норозилигини яширмаган эди. Чоршанба, 14 январь куни Reuters агентлигининг Мачадодан совринни кутаётгани ҳақидаги саволига Трамп: “Йўқ, мен ундай демадим. Нобельни у ютди”, деб жавоб берган эди.
Трампнинг “реалистик” ёндашуви
Тахминан бир соат давом этган ушбу учрашув икки сиёсатчининг илк юзма-юз мулоқоти бўлди. Шундан сўнг Мачадо Капитолийда ўндан ортиқ сенаторлар билан кўришди. Оқ уй матбуот котиби Каролин Ливиттнинг билдиришича, Трамп Мачадо билан учрашувни интизорлик билан кутган, бироқ у ҳали ҳам ўзининг “реалистик” баҳосида қолмоқда: президентнинг фикрича, Мачадода ҳозирча мамлакатни бошқариш учун етарли қўллов мавжуд эмас.
Ўтган декабрь ойида денгиз орқали Венесуэладан қочишга муваффақ бўлган Мачадо ҳозирда Трампнинг эътиборини қозониш учун амалдаги Венесуэла ҳукумати вакиллари билан рақобатлашмоқда.
Венесуэладаги янги ҳокимият ва нефть манфаатлари
Reuters’нинг ёзишича, АҚШ махсус операцияси натижасида Николас Мадуро қўлга олингач, мамлакатда демократлаштириш жараёни бошланишига умид боғланмоқда. Бироқ демократ америкалик сенатор Крис Мерфи вазиятга шубҳа билан қарамоқда. Унинг сўзларига кўра, Венесуэланинг муваққат президенти Делси Родригес Трампнинг қўллови билан ўз мавқейини мустаҳкамлаб бормоқда.
Дональд Трамп ўз навбатида АҚШнинг Венесуэла нефтьига бўлган кириш имкониятини таъминлаш ва мамлакат иқтисодиётини қайта тиклашга эътибор қаратганини айтган. У бир неча бор Родригесни мақтаб, у билан мулоқот қилиш “жуда ёқимли” эканини таъкидлади.
Делси Родригес эса АҚШ билан дипломатияга тайёрлигини билдириб, Вашингтонга бориш керак бўлса, буни ўз оёқлари билан бориб амалга оширишини айтди. Шунингдек, у хорижий инвесторлар учун нефть саноатида ислоҳотлар ўтказишни таклиф қилмоқда.
