Венесуэла мухолифат етакчиси Мариа Корина Мачадо — тинчлик бўйича 2025-йилги Нобель лауреати — ўз мукофотини АҚШ президенти Дональд Трампга бағишлади.
Оқ уйда бўлиб ўтган матбуот анжуманида Трамп Мачадо билан телефон орқали суҳбатлашганини маълум қилган. Президент суҳбат давомида Мачадо жуда самимий ва меҳрибон бўлганини таъкидлаган.
“Бугун Нобель лауреати менга қўнғироқ қилиб, “Мен бу мукофотни сизнинг шарафингизга қабул қиламан, чунки сиз бунга ҳақиқатдан лойиқсиз”, деди, дея сўзлаб берган Трамп.
АҚШ президенти Мочадодан мукофотини беришини сўрамаганини таъкидлаган. Айни пайтда, Мачадо ижтимоий тармоқдаги саҳифасида мукофотни Венесуэла халқининг эркинлик ва демократия йўлидаги курашига бағишлаганини айтганди. У Дональд Трамп ва америкаликларни ўзининг асосий иттифоқчилари деб ҳисоблайди.
“Мен бу мукофотни Венесуэла халқига ва бизнинг курашимизга қатъиян ёрдам кўрсатган Трампга бағишлайман”, деб пост қолдирган Мачадо.
Олдинроқ Венесуэла мухолифати етакчиси Мариа Корина Мачадо мамлакатида демократик ҳуқуқлар учун курашгани шарафига 2025 йил Нобель тинчлик мукофотига лойиқ кўрилгани хабар қилинганди.
