Канада бош вазири Марк Карни Пекинда бўлиб, Хитой раиси Си Цзиньпин билан учрашув ўтказди. Канадаликлар етакчиси икки давлат ўртасида стратегик ҳамкорлик даври бошланганини эълон қилди. У, шунингдек, Хитойнинг ҳаракатларини башорат қилиш АҚШдан кўра осонроқлигини ҳам таъкидлади.
Карнига кўра, тобора мустаҳкамланиб бораётган муносабатлар ҳар иккала мамлакат учун “тарихий ютуқлар” олиб келиши мумкин. Канада бош вазири Пекинга Қўшма Штатлар билан савдо муносабатлари таранглашган бир вақтда борди. Хитой мамлакатнинг АҚШдан сўнг иккинчи энг йирик савдо ҳамкори ҳисобланади.
Канада бош вазири хитойлик ҳамкасбига мурожаат қилиб, ҳамкорлик алоқаларининг қутбланиш кучайиб бораётган бир вақтда ривожланаётганини таъкидлади. Шунингдек, қишлоқ хўжалиги, озиқ-овқат хавфсизлиги, энергетика маҳсулотлари ва молия каби соҳаларга эътибор қаратишга чақирди.
Учрашувда, шунингдек, томонлар савдо келишувига эришилганини маълум қилди. Карнига кўра, Хитой Канададан импорт қилинадиган канола уруғига қўйилган божхона таърифларини 84 фоиздан 15 фоизгача туширади. Канада эса Хитойда ишлаб чиқарилган электромобилларга 100 фоизлик таърифларни юмшатиб, қарийб 50 минг машинани 6,1 фоиз бож билан олиб киришга розилик берди.
Марк Карни 2017-йилдан бери Хитойга ташриф буюрган илк Канада бош вазири ҳисобланади. Икки давлат муносабатлари Huawei молиявий директори Мен Ванжоу Ванкуверда ҳибсга олинган 2018-йилдан сўнг кескинлашган. Бу ўзаро ҳибслар, божлар ва инсон ҳуқуқлари бузилиши бўйича айбловларни эргаштириб келганди.
