АҚШ президенти Дональд Трамп агар Канада Хитой билан савдо битими тузса, унинг барча маҳсулотларига 100 фоизлик бож жорий этишини маълум қилди. Бу ҳақда сиёсатчи ўзининг Truth Social ижтимоий тармоғида ёзди.
Трампнинг фикрича, Канада бош вазири Марк Карни (Трамп ўз постида уни “губернатор” деб атаган) агар мамлакатини “Хитой товарлари учун транзит марказга айлантира оламан” деб ўйлаётган бўлса, жиддий адашади.
“Хитой Канадани тириклайин ва бутунлай ютиб юборади, шу жумладан, бизнес, ижтимоий тузилма ва умуман турмуш тарзини йўқ қилади. Агар Канада Хитой билан битим тузса, АҚШга келадиган барча Канада товарлари ва маҳсулотларига зудлик билан 100 фоизлик бож солиғи солинади”, деган Трамп.
Карни яқинда Хитойга ташрифи чоғида Пекинни “ишончли ҳамкор” деб атаганди. Давосдаги иқтисодий форумда ҳам у Европа етакчиларини Хитойдан сармоя жалб қилишга чақирганди. Шунингдек, бош вазир “буюк давлатлар” қоидаларга риоя қилишдан бош тортиши туфайли “дунё ўзгараётгани” ҳақида гапирган. У АҚШнинг қўрқитиш учун божлардан фойдаланаётганини танқид ҳам қилганди.
“Ўрта даражадаги давлатлар биргаликда ҳаракат қилиши керак, чунки агар сиз столда бўлмасангиз, менюдасиз. Буюк давлатлар якка ҳолда ҳаракат қилиши мумкин. Уларнинг бозорлари, ҳарбий қудрати, шартларни белгилаш дастаги бор. Ўрта давлатларда бу йўқ.
Биз гегемон билан яккама-якка музокаралар олиб борганимизда, буни заифлик нуқтайи назаридан қиламиз. Биз таклиф этилган нарсани қабул қиламиз. Энг қулай ҳамкор бўлиш учун бир-биримиз билан рақобатлашамиз. Бу суверенитет эмас. Бу бўйсунишни қабул қилган ҳолда суверенитетни саҳналаштириш, холос”, деганди Марк Карни.
Трамп 22 январь куни Канададан “Тинчлик кенгаши”га қўшилиш таклифини қайтариб олди. Бу ҳолат Канада бош вазирининг юқоридаги нутқидан сўнг юз берган. Канада бош вазири ўз нутқида Трамп номини бир марта ҳам тилга олмаган. Бироқ унинг сўзлари айнан АҚШ президенти сиёсатига қарши туришга тайёргарлик сифатида баҳоланган.
