Саудия Про лигаси вакили — “Ал-Иттиҳод” клубининг эгаси ва президенти Анмар Ал Ҳаили Аргентина терма жамоаси ҳужумчиси Лионель Мессига таклиф қилинган шартнома миқдорини очиқлади. Шунингдек, Ал Ҳаили келажакда футболчи билан келишувга эришишга тайёр эканини билдирди.
“Мен у билан аввалроқ, ‘ПСЖ’даги шартномаси якунлангач боғлангандим. Унга йилига 1,4 миллиард евро таклиф қилдим, бироқ у рад этди, чунки унинг оиласи Америка Қўшма Штатларини афзал кўрди. Мен буни ҳурмат қиламан ва ‘Ал-Иттиҳод’ ҳар доим уни қабул қилишга тайёр. У истаган пайт Жиддага келиши мумкин”, — деди Ал Ҳаили.
“Ал-Иттиҳод” президенти Лео Месси шартнома имзолашга рози бўлган тақдирда, унга хоҳлаганича, ҳатто умрбод даромад топиш имконини берадиган битим таклиф қилишини ҳам таъкидлаб ўтди:
“Мессининг бу ерда, Саудия Арабистонида, бизнинг либосимизда ўйнаши молиявий жиҳатдан мен учун ҳеч нарса англатмайди. Мен Мессининг келишини хоҳлайман, чунки тарихдаги энг буюк футболчига эга бўламан”.
Маълумот учун, Лионель Месси “Барселона” сафида 17 йил (2003–2021) давомида фаолият юритган. Ҳужумчи ушбу давр мобайнида 778 та учрашувда иштирок этиб, 672 та гол муаллифига айланган. Шунингдек, у “кўк-анорранглилар” билан 35 та совринни қўлга киритган. Аргентиналик футболчи кейинчалик Парижнинг “ПСЖ” клуби билан шартнома имзолаб, 2023 йилгача жамоа шарафини ҳимоя қилди. Ҳозирда эса Месси АҚШнинг “Интер Майами” клуби сафида тўп сурмоқда.
