Англиянинг “Манчестер Юнайтед” клуби раҳбарияти жамоа бош мураббийи Рубен Аморимни лавозимидан озод этиш қарорини қабул қилди. Бу ҳақда клуб матбуот хизмати хабар берди.
Унга кўра, “қизил иблислар” раҳбарияти Аморимни истеъфога чиқариш бўйича қарорни бугун, 5 январь тонгида қабул қилган. Жамоага вақтинча “Манчестер Юнайтед”нинг собиқ футболчиси Даррен Флетчер бош мураббий этиб тайинланади.
Эслатиб ўтамиз, Рубен Аморим 2024 йил ноябрь ойида “Манчестер Юнайтед”ни бошқариб келаётган эди. Манкунианликлар португалиялик мутахассис қўл остида 63 та учрашув ўтказган бўлиб, 25 та ғалаба, 15 та дуранг ва 23 та мағлубият қайд этган. Айни пайтда “Манчестер Юнайтед” Англия Премьер Лигаси турнир жадвалида 31 очко билан 6-ўринни эгаллаб турибди.
Бунга қадар Аморим Лиссабоннинг “Спортинг” клубида фаолият юритиб, ушбу жамоа билан Португалия чемпионлигини қўлга киритган.
