Испания Венесуэладаги можарони ҳал этишга кўмаклашишга тайёр. Бу ҳақда қироллик Ташқи ишлар вазирлиги матбуот хизмати хабар берди.
Шунингдек, баёнотда Испания томони Каракасдаги элчихона ҳамда фавқулодда вазиятлар бўйича консуллик хизмати билан доимий алоқада экани, мамлакатдаги испан диаспорасининг аҳволини назорат қилиб туриши айтилган.“Испания вазиятни юмшатиш ва босиқлик сақланишига, шунингдек, халқаро ҳуқуқ ва БМТ низоми тамойилларига доимий ҳурмат асосида ҳаракат қилинишига чақирмоқда. Шу муносабат билан Испания ҳозирги инқирозни тинч йўл билан ва келишилган тарзда ҳал этиш учун ўз хизматларини таклиф этишга тайёр”, дейилади хабарда.
Аввалроқ АҚШ президенти Дональд Трамп АҚШ ҳарбий кучлари Венесуэлага зарба берганини тасдиқлаган. Шунингдек, у мамлакат раҳбари Николас Мадуро рафиқаси билан бирга Американинг Delta махсус бўлинмаси жангчилари томонидан қўлга олиниб, Венесуэладан олиб чиқиб кетилганини маълум қилди.
Трампнинг айтишича, Венесуэладаги операция пухта режалаштирилган бўлиб, унга кўплаб ҳарбийлар жалб этилган.
АҚШ президентининг миллий хавфсизлик бўйича маслаҳатчиси Марко Рубио республика президенти Николас Мадуро ҳибсга олинганидан сўнг Вашингтоннинг Венесуэлага нисбатан кейинги ҳаракатлари кутилмаётганини билдирди.
