Таиланднинг Паттая шаҳрида 25-қаватдан тушиб кетган 26 ёшли аёл омон қолди. Бу ҳақда Тҳе Thaiger нашри хабар берди.
Ҳодиса 28 декабрь куни аёл турмуш ўртоғи билан жанжаллашганидан сўнг содир бўлган. Эрталаб соат 7:06 да қутқарувчилар турар жой мажмуаси қўриқчисидан фавқулодда қўнғироқни қабул қилган. У аёл бинонинг баланд қаватидан тушиб кетганини маълум қилган.
Воқеа жойига етиб келган қутқарувчилар аёлни бассейн четида ётган ҳолда топган. У Алварадо исмли Таиланд фуқароси экани аниқланган. Аёл бассейн сувига қисман ботган, оғир тан жароҳатлари олган, оғзи ва бурнидан қон кетаётган бўлган. Қутқарувчилар жойида биринчи ёрдам кўрсатиб, уни шошилинч тарзда шифохонага олиб кетган.
Кейинроқ ҳодисани ўрганиш учун Муэанг Паттая полиция бўлими ходимлари етиб келган. Дастлабки суриштирувларга кўра, аёл хорижлик турмуш ўртоғи билан бинонинг 25-қаватида яшаб келган. Эркакнинг шахси ва фуқаролиги ҳозирча ошкор этилмаган.
Гувоҳлар ҳодисадан олдин эр-хотин ўртасида жанжал бўлганини айтмоқда. Полиция фикрича, кучли шамол аёл танасини пастдаги бассейн томонга йўналтирган, бу эса зарбанинг кучини камайтирган бўлиши мумкин. Шунга қарамай, баландлик сабаб Алварадо оғир жароҳатлар олган.
Жабрланувчининг эри батафсил сўроқ қилиш учун полиция бўлимига олиб кетилган. Ҳозирда аёлнинг тасодифан йиқилиб тушгани, ўзи сакрагани ёки итариб юборилганианиқланмоқда. Шунингдек, ҳодисага оид гувоҳлар кўрсатмалари ва видеокузатув ёзувлари тўпланмоқда.
