Шимолий Корея етакчиси Ким Чен Ин мамлакат шимоли-шарқидаги туристик зонада янги меҳмонхоналарнинг очилиш маросимида иштирок этди. Бу ҳақда корейс давлат нашри KCNA хабар берди.
КХДР етакчисига ушбу тадбирда қизи Жу Аэ ҳамроҳлик қилди. Давлат оммавий ахборот воситалари томонидан эълон қилинган фотосуратларда Ким Чен Иннинг қизи билан бирга ҳашаматли меҳмонхоналарни кўздан кечираётгани акс этади. Маълумот ўрнида, бир қатор таҳлилчилар ўсмир ёшдаги Жу Аэни мамлакатнинг бўлажак раҳбари сифатида кўрмоқда.
“Ушбу меҳмонхоналар халқимиз мақоми юксалиб бораётганининг ва мамлакатимиз ривожланиш салоҳиятининг яққол исботидир”, деган КХДР раҳбари.
Шимолий Корея етакчиси сўнгги бир ой ичида турли объектларнинг очилиш маросимларида фаол иштирок этмоқда. Масалан, ўтган ҳафтанинг ўзида у учта минтақавий заводнинг очилишида қатнашган.
Бундай фаоллик 2026-йилнинг бошига режалаштирилган Меҳнат партиясининг навбатдаги съезди билан боғлиқ. Беш йилда бир марта ўтказиладиган ушбу съездда мамлакатнинг келгуси беш йиллик ривожланиш режаси эълон қилиниши кутилмоқда. Нодон Синмун каби давлат нашрлари халқни ушбу муҳим анжуман олдидан йирик лойиҳаларни якунлаш учун бор куч-ғайратни сафарбар этишга чақирмоқда.
Маълумот ўрнида, июнь ойида Шимолий Корея тарихида биринчи марта ўзининг пляж курортини очиши ҳақида хабар берилган эди. Мамлакат раҳбари ўшандан буён туризм соҳаси ривожлантирилишини маълум қилганди. Унга кўра, “Wonsan Kalma” номли курорт Шимолий Кореянинг шарқий соҳилида қуриб битказилган. Зона 1 июль куни маҳаллий сайёҳлар учун очилиши режалаштирилганди. Хорижлик туристларга эса қачон рухсат берилиши эса ҳалигача номаълум.
