“Манчестер Сити” ҳужумкор ярим ҳимоячиси Дивайн Мукаса жамоадоши Абдуқодир Ҳусановнинг ўйинини юқори баҳолади. Кеча 17 декабрь куни ҳар икки футболчи Англия Лига кубоги чорак финали доирасидаги “Брентфорд”га қарши ўйинда “шаҳарликлар”нинг асосий таркибида майдонга тушди. Учрашув 2:0 ҳисобидаги “Манчестер Сити”нинг ғалабаси билан якунланди.
“Ҳусановни алдаб ўтиш жуда қийин! У ‘Брентфордънинг деярли барча хавфли ҳужумларини бартараф этди. Биз бунинг учун ундан миннатдормиз”, деди 18 ёшли Мукаса ўйиндан кейинги интервьюсида.
Маълумот учун, Абдуқодир Ҳусанов “Брентфорд”га қарши учрашувни тўлиқ ўтказди. Ўзбекистонлик марказий ҳимоячи 16-дақиқада сариқ карточка олди. Англия Лига кубоги ярим финалида Хосеп Гвардиола бошчилигидаги жамоа “Ньюкасл”га қарши майдонга тушади.
Шунингдек, ўйиндан кейинги матбуот анжуманида меҳмонлар бош мураббийи Кит Эндрюс учрашув ҳақида фикр билдирар экан, Абдуқодир Ҳусановга қизил карточка кўрсатилиши керак бўлганини таъкидлади.
Айни пайтда ўзбекистонлик футболчининг трансфер қиймати 35 миллион еврога баҳоланмоқда. Ҳусанов ҳозирда Англия Премьер лигасида тўп тепаётган энг қиммат 96-футболчи ҳисобланади. “Манчестер Сити” таркибида эса ушбу кўрсаткич бўйича 16-ўринни эгаллаб турибди.
