Лондоннинг “Челси” клуби раҳбарияти италиялик мутахассис Энсо Марескани январь ойида ишдан бўширишни режалаштирмоқда. Бу ҳақда инсайдер Фабрицио Романо хабар берди. Клуб унинг ўрнига “Барселона” собиқ устози Хави Эрнандесни олиб келишни истамоқда.
Унга кўра, лондонликлар айни пайтда Хавининг вакиллари билан музокаралар ўтказмоқда. Агар келишув ижобий якунланса, испаниялик мураббий фаолиятини Англия Премьер Лигасида давом эттириши мумкин,
Мареска “Эвертон” (2:0) устидан қозонилган ғалабадан кейин берган интервьюсида, “Челси” раҳбариятидаги баъзи одамлар уни ва клубни қўлламаётганини айтиб, катта шов-шувга сабаб бўлган. Мазкур ҳолат ортидан клуб мутахассис билан шартномани бекор қилишни мақсад қилган.
Маълумот учун, Энсо Мареска 2024 йил ёзидан буён “Челси”ни бошқариб келмоқда. Мареска ҳозирга қадар “Челси” билан иккита соврин — Конференциялар Лигаси ҳамда Клублар ўртасидаги Жаҳон чемпионати олтин медалларини қўлга киритган. Унинг лондонликлар билан шартномаси 2029-йилнинг ёзига қадар амал қилади. Айни пайтда “Челси” Англия Премьер Лигасининг турнир жадвалида 28 очко билан тўртинчи поғонани эгаллаб турибди.
