Беларусь президенти Александр Лукашенко республикада судланган турли мамлакатларнинг 123 нафар фуқаросини афв этди. Бу ҳақда Беларусь етакчиси матбуот хизмати хабар берди.
Қарор АҚШ президенти Дональд Трамп билан эришилган келишувлар доирасида қабул қилинган. Бунинг эвазига Вашингтон Беларусьнинг калий саноатига нисбатан жорий этилган санкцияларни бекор қилади.
АҚШ бу чекловларни 2021-йилда жорий этиб, дунёдаги энг йирик ўғит етказиб берувчилардан бири бўлган “Беларусь калий компанияси”ни қора рўйхатга киритган эди. Санкциялар доирасида компания билан ҳамкорлик тўхтатилган ва унинг АҚШ ҳудудидаги активлари музлатиб қўйилган.
Афв этилган шахслар Беларусьда жосуслик, террорчилик ва экстремистик фаолият айбловлари билан судланган. Улар орасида беларуслик мухолифатчи Мария Колесникова, “Белгазпромбанк” собиқ раҳбари ва Лукашенконинг 2020-йилги президент сайловларидаги рақиби Виктор Бабарико, шунингдек, тинчлик бўйича Нобель мукофоти совриндори Алес Беляцкий ҳам бор.
Ноябрь охиридан буён Лукашенко жами 156 кишини афв этган. Улар орасида Украина, АҚШ, Буюк Британия, Литва, Латвия, Австралия ва Япония фуқаролари ҳам мавжуд.
