“Сан-Паулу” клубининг 34 ёшли ҳужумкор ярим ҳимоячиси Оскар профессионал футболчилик фаолиятини якунлашга қарор қилди. Бу ҳақда Daily Sport нашри хабар берди.
Манбага кўра, бразилиялик футболчи соғлиғидаги муаммолар туфайли футболни тарк этиш ниятида эканини яқинларига маълум қилган. Шу муносабат билан “Сан-Паулу” раҳбарияти Оскар билан учрашув ўтказиб, унинг келажакдаги режалари ҳақида батафсил маълумот олишни режалаштирмоқда.
Қайд этилишича, клуб футболчи билан бутунлай хайрлашмаслик имкониятини кўриб чиқмоқда. Хусусан, Оскарга “Сан-Паулу” тизимида бошқа лавозим таклиф этилиши мумкин. Клуб футболчига қарор қабул қилиш учун аниқ муддат белгиламаган. У ўз келажаги ҳақида хотиржам ўйлаб кўриши мумкин.
Эслатиб ўтамиз, 11 ноябрь куни Оскар клубнинг машғулот базасида ўтказилган режалаштирилган тиббий кўрик вақтида ҳушини йўқотган. Кейинчалик шифокорлар унда юрак билан боғлиқ муаммолар борлигини аниқлашган.
34 ёшли Оскар “Сан-Паулу” тарбияланувчиси ҳисобланади. Футболчи бунга қадар “Интернасионал” (Бразилия), “Шанхай Порт” (Хитой) ва “Челси” (Англия) жамоаларида тўп сурган бўлиб, 2025-йилнинг январида “Сан-Паулу”га қайтганди. Ҳужумчи “Челси” билан икки марта Англия чемпиони, мамлакат кубоги ҳамда Европа Лигаси совринларига эга чиққан. “Шанхай Порт” билан эса миллий чемпионатни уч марта, кубок ва Суперкубокни бир мартадан қўлга киритган.
Бразилия терма жамоаси сафида Оскар 48 ўйинда майдонга тушиб, 12 та гол ва 15 та голли узатма муаллифига айланган. У 2013-йилда “пентакампеонлар” билан Конфедерациялар кубогида зафар қучган. Шунингдек, у 2011-йилда U-20 Жаҳон чемпионати олтин медалалрига ҳам эга чиққан.
