“Реал Мадрид” Испания Ла Лигаси 15-тури доирасида ўз майдонида “Сельта”ни қабул қилди ва жорий мавсумдаги иккинчи мағлубиятини қабул қилиб олди.
Учрашувнинг биринчи бўлимида жамоанинг асосий ҳимоячиларидан бири Эдер Милитао жароҳат олиб майдонни тарк этди. 53-дақиқада “Сельта” ярим ҳимоячиси Виллиот Сведберг ҳисобни очди. 64-дақиқада “Реал” ҳимоячиси Фран Гарсия икки дақиқа ичида кетма-кет иккита сариқ карточка олиб, майдондан четлатилди. 90+2-дақиқада Альваро Каррерас ҳам иккинчи сариқ карточка эвазига майдонни тарк этди. Орадан бир дақиқа ўтиб, Сведберг дубль қайд этди — 0:2.
Бу “Реал”нинг “Сельта”га қарши 2017 йилдан буён учралган илк мағлубияти бўлди. Ўша санадан бери мадридликлар бу рақибга қарши 19 ўйинда мағлуб бўлмаётган эди.
Шунингдек, Винисиус Жуниорнинг голсиз серияси давом этмоқда — бразилиялик футболчи клуб сафида кетма-кет 11 ўйиндирки, гол ура олмаяпти. Унинг охирги голлари 4 октябрь куни “Вильярреал”га қарши баҳсда киритилган эди.
Учрашув якунида “Реал” бош мураббийи Хаби Алонсо ҳакамнинг қарорларидан норози эканини билдирди:
“Ҳакам қарорлари бизни ўйиндан чиқариб юборди. Темпимиз бузилди. Каррераснинг четлатилиши жуда баҳсли. Умуман, ҳакамлик менга ёқмади”, — деди у.
Ушбу мағлубиятдан сўнг “Реал” ва “Барселона” ўртасидаги фарқ 4 очкога етди. Мадрид клуби 16 ўйиндан сўнг 36 очко билан иккинчи, “Барселона” эса 40 очко билан биринчи ўринда бормоқда.
Маълумот учун, 2026 йил январь ойида Саудия Арабистонида Испания Суперкубоги мусобақаси ўтказилиши сабабли, Ла Лига 19-туридан ўрин олган “Реал Мадрид” – “Атлетик Бильбао” ва “Барселона” – “Атлетико Мадрид” ўйинлари эртароқ ўтказилган.
