АҚШ президенти Дональд Трамп Украина етакчиси Владимир Зеленский ҳали Америка томонидан ишлаб чиқилган тинчлик режаси билан танишиб чиқмаганидан ҳафсаласи пир бўлганини маълум қилди. У бу фикрни Жон Кеннеди номидаги саҳна санъати марказида бўлиб ўтган маросимда билдирди.
“Биз президент Путин билан ҳам, Украина раҳбарлари, жумладан, Зеленский билан ҳам суҳбатлашдик. Айтишим керакки, президент Зеленскийнинг ҳали тинчлик таклифини ўқимаганини эшитиб, бир оз хафа бўлдим. Буни бир неча соат олдин билдим. Зеленскийнинг атрофидагиларга режамиз ёққан, аммо унга ёқмагандек. Россияга имкон бўлса, бутун Украинани эгаллаган бўларди. Аммо, менимча, Россия тинчлик режасидан қониқади. Лекин Зеленский бунга рози бўладими-йўқми — бунга унчалик ишонмайман”, деган Трамп.
Эслатиб ўтамиз, 2 декабрь куни АҚШ президентининг махсус элчиси Стив Уиткофф ва Трампнинг куёви Жаред Кушнер Москва шаҳрида Россия президенти Владимир Путин билан беш соатлик музокара ўтказган эди.
Президент ёрдамчиси Юрий Ушаковнинг маълум қилишича, учрашувда Америка тинчлик режаси ҳамда Россияга топширилган ушбу масалага оид яна тўртта қўшимча ҳужжат муҳокама қилинган. Ғарб оммавий ахборот воситалари ёзишича, энг мураккаб масала Украинанинг Донбасснинг ўз назоратидаги қисмини Россияга топширишдан бош тортиши бўлган.
