Россия Украинага хавфсизлик кафолатлари берилишида ҳеч қандай сўз ва ҳуқуққа эга бўлмаслиги керак. Бу ҳақда Финляндия президенти Александр Стубб The Guardian нашрига берган интервьюсида айтиб ўтган.
Стуббнинг сўзларига кўра, Россия Украинага таклиф қилинадиган хавфсизлик кафолатларининг тайёрланишида иштирок этмасликка рози бўлмаслиги мумкин. Бироқ бу ҳеч қандай аҳамиятга эга эмас.
“Россияда мустақил давлатнинг суверен қарорларига таъсир ўтказиш ҳуқуқи мутлақо йўқ. Россия бунга (Украинага хавфсизлик кафолатлари берилишида қатнашмасликка — таҳрир.) рози бўладими-йўқми, деган савол ҳам ўринли эмас. Албатта, Россия бунга рози бўлмайди, лекин бу ҳеч қандай аҳамиятга эга эмас”, деган Финляндия президенти.
Фин сиёсатчисининг таъкидлашича, моҳиятан хавфсизлик кафолатлари Россияни тийиб турувчи омил ҳисобланади. Россия келажакда яна Украинага тажовуз қиладиган бўлса, Европа давлатлари ҳарбий тўқнашувга тайёр туриши лозим.
“Хавфсизлик кафолатлари моҳиятан тўсиб турувчи омилдир ва бу омил ишонарли бўлиши керак. Ишонарли бўлиши учун эса кучли ишлаб чиқилган бўлиши шарт. Бу стратегик коммуникацияни ҳам ўз ичига олади. Шунинг учун биз мавҳум хавфсизлик кафолатларини эмас, балки ҳақиқатдан ишлайдиган хавфсизлик берамиз. Россия бундан хабардор”, дея қўшимча қилган Стубб.
The Guardian Стубб АҚШ президенти Дональд Трамп билан яхши муносабатлар ўрнатганини ҳам қайд этган. Фин сиёсатчи ва Дональд Трамп биргаликда голф ҳам ўйнаган. Шу сабабли у Украина урушини тугатиш масаласида Трампнинг Европа етакчилари билан музокараларида муҳим ўйинчига айланган.
Украинага хавфсизлик кафолатларини бериш масаласи бир неча ойдан буён “кўнгиллилар коалицияси” вакиллари томонидан муҳокама қилинмоқда. Бироқ бу масала бўйича Европа давлатлари орасида ҳануз бирлик йўқ. Айрим давлатлар Киевга қўшин юборишга тайёр бўлса, баъзилар буни қатъий рад этмоқда. Сентябрь ойи бошида Франция президенти Эммануэл Макрон хавфсизлик кафолатларининг ишлаб чиқилишида иштирок этишга 26 давлат розилик билдирганини айтган. Москва эса кўп марта Украинага бошқа давлатларнинг қўшинлари киритилишини қабул қилиб бўлмас шарт сифатида баҳолаган. Россия бунга ҳеч қачон рози бўлмаслигини таъкидлаган.
