АҚШнинг Калифорния штатида боланинг туғилган кунида содир бўлган отишмада тўрт киши ҳалок бўлди. Бу ҳақда Sky News хабар берди.
Полиция маълумотига кўра, ҳодиса 29 ноябрь куни Стоктон шаҳрида юз берган, отишмада ўн киши яраланган. Ҳужум қилган шахс эса ҳали ҳам қўлга олинмаган.
“Тахминан 14 кишига ўқ узилгани ва тўрт нафар қурбоннинг вафот этгани тасдиқланди”, дея хабар берди Сан-Хоакин округи шерифи идораси.
Дастлабки маълумотларга кўра, бу “мақсадли ҳужум” сифатида баҳоланмоқда, қурбонлар орасид болалар ҳам бор, бироқ тафсилотлар чекланган. Полиция ҳозирча ҳужум қилган шахснинг кимлигини ошкор қилмаган, ҳужум мотиви ҳам номаълум. Расмийлар жароҳатланганларнинг аҳволи ҳақида қўшимча маълумот бермади. Бир нечта одам касалхонага олиб кетилган.
