Жанубий Африкада 153 нафар фаластинлик йўловчи тахминан 12 соат давомида самолётдан туширилмай ушлаб турилди. Бу ҳақда Deutsche Welle хабар берди.
Йўловчилар Кениядан учиб келган чартер рейси билан 13 ноябрь куни эрталаб Йоҳаннесбургдаги О.Р. Тамбо аэропортига қўнган. Маҳаллий матбуот уларнинг урушдан вайрон бўлган Ғазодан қочиб чиққанини билдирган.
Нега улар самолётдан туширилмади?
Иммиграция хизмати фаластинликлар паспортларида Исроил томонидан қўйилиши керак бўлган чиқиш муҳри йўқлиги, шунингдек, Жанубий Африкадаги манзил ва қолиш муддати кўрсатилмаганини даъво қилган. Полиция ҳам йўловчилар паспортларида одатий чиқиш муҳрлари бўлмаганини, бироқ уларнинг ҳеч бири бошпана сўрамаганини маълум қилган.
Маҳаллий руҳоний Найжел Бранкен самолётга киришга рухсат олган ва вазиятни ўта оғир деб тасвирлаган:
“Жуда иссиқ эди. Болалар йиғлаб, қичқириб, терлаб ўтиришарди”, деган у САBS телеканалига.
Вазиятга ЖАР Ички ишлар вазирлиги аралашганидан кейин йўловчиларга самолётдан тушишга рухсат берилган. Маҳаллий “Gift of the Givers” нодавлат ташкилоти уларга вақтинчалик жой ажратган. 153 йўловчидан 23 нафари бошқа давлатларга учиб кетган бўлса, 130 нафар фаластинлик мамлакатда қолган.
Исроил Ғазони тарк этишга рухсат берди
Рейс ҳақида маълумотлар турлича. Айрим хабарларга кўра, самолёт Жанубий Африка компанияси томонидан бошқарилган. Яҳудий Haaretz газетаси Исроил фаластинликларнинг сектордан чиқиб кетиш чекловларини юмшатганини ёзмоқда.
Нашрга кўра, Исроил фаластинликларга Рамон аэропорти орқали учишга рухсат берган, бироқ бунинг учун қабул қилувчи давлат самолёт ажратиши кераклиги айтилган. Аммо юқоридаги ҳолатда нега фаластинликларнинг паспортлари муҳрланмагани ва Жанубий Африка расмийлари уларнинг келишдан бехабар бўлгани номаълумлигича қолмоқда.
“Gift of the Givers” раҳбари Имтиёз Сулаймоннинг айтишича, сўнгги икки ҳафтада яна бир самолётда фаластинликлар ЖАРга келган, йўловчиларнинг ўзи ҳам қаерга кетаётгани ҳақида тўлиқ маълумотга эга бўлмаган.
Жанубий Африка — Исроилнинг кескин танқидчиси
Жанубий Африка узоқ йиллардан бери Исроил сиёсатини очиқ танқид қилиб келади ва уни мамлакатнинг ўтмишдаги апартеид режими билан қиёслайди. Мамлакат Исроилни Халқаро судга ҳам берган.
Haaretz маълумотларига кўра, ҳозиргача 7 минг фаластинлик Керем Шалом орқали, яна 30 минг нафари эса Рафаҳ орқали Ғазодан чиқиб кетган. Халқаро Қизил Хоч қўмитаси эса босиб олинган ҳудуд аҳолиси ихтиёрига қарши кўчирилса, бу уруш жинояти ҳисобланишини эслатмоқда.
