“Милан” ва “Интер” клублари Италия футболининг рамзларидан бири — “Сан-Сиро” стадионини сотиб олиш бўйича шаҳар ҳокимияти билан келишувга эришди. Бу ҳақда “нерадзуррилар” матбуот хизмати хабар берди.
Маълум қилинишича, клублар “Сан-Сиро” жойлашган ҳудудни тўлиқ харид қилган. Мазкур жойда Евро–2032 ўйинларига тайёр бўладиган янги замонавий стадион бунёд этилади.
Италия ОАВлари тарқатган хабарга кўра, ҳозирги “Сан-Сиро” тўлиқ бузиб ташланади, янги арена эса 2031-йилгача фойдаланишга топширилади.
Эслатиб ўтамиз, Италия Туркия билан бирга 2032-йилги Европа чемпионатига мезбонлик қилади. Турнир учун стадионлар рўйхатини УЕФАга топшириш муддати — 2026 йил октябрь. Ҳозирги “Сан-Сиро” УЕФА талаблари даражасига жавоб бермайди, ҳатто тўлиқ реконструкция қилинса ҳам Евопа чемпионатини қабул қила олмаслиги мумкин.
Маълумот ўрнида, “Сан-Сиро” (ёки “Жузеппе Меаца”) стадиони 1926-йилда қурилган бўлиб, охирги марта 1989-йилда реконструкция қилинган. Арена Евро–1980 ўйинларини, шунингдек, 1934 ва 1990-йилги Жаҳон чемпионатлари ҳамда 2001 ва 2016-йиллардаги Чемпионлар Лигаси финалларини қабул қилган.
