Россия президенти Владимир Путин 2050 йилгача ҳокимиятда қолишни хоҳлайди. Бу ҳақда суриштирув журналисти Илья Давлятчинга таяниб, Daily Star хабар берди.
Журналистнинг айтишича, Иосиф Сталин давридан бери Кремльни энг узоқ муддат бошқараётган 73 ёшли Путин ҳокимиятни 97 ёшгача сақлаб қолишни истайди. Шундан сўнг эҳтимол уни ўғли Иванга топширмоқчи. Иван ҳозирда 10 ёшда, 2050 йилга келиб эса 35 ёшга тўлади.
2020 йилда Путиннинг президентлик муддатларини “нолга тушириш” билан ўзгартирилган амалдаги конституция унга 2036 йилгача, яъни 83 ёшгача президентлик лавозимини эгаллаш имконини беради.
Путин аллақачон ҳокимиятда бўлиш муддати бўйича Пиночет (17 йил), Ким Чен Ир (17 йил), Бенито Муссолини, Индонезия президенти Сухарто (20 йил) ва Руминияни 24 йил бошқарган Николаэ Чаушескудан ўзиб кетган. Путин бешинчи муддати охирида Мао Сзедунни ортда қолдириши, олтинчи муддатда эса ҳар бири 36 йилдан ҳукмронлик қилган Франсиско Франко (Испания) ва Антонио ди Салазарга (Португалия) етиб олиши мумкин.
Агар Путин 2050-йилгача ҳокимият тепасида қолса, у Муаммар Каддафий (42 йил), Ким Ир Сен (46 йил) ва Фидел Кастрони (49 йил) ортда қолдириб, Россияда Иван Грозний давридан бери энг “узоқ ҳукмронлик қилган” раҳбарга айланади. Иван Грозний 50 йил ҳукмронлик қилган.
2024 йил Тhе Times газетаси вазиятдан хабардор манбаларга таяниб, Путин атрофидагилар Россия президентининг умрини узайтириш масалалари билан фаол шуғулланаётганини ёзганди. Соғлиқни сақлаш вазирлигига эса сентябрь ойида қаришга қарши кураш бўйича барча мавжуд илмий ишланмаларни зудлик билан тўплаш топширилган.
“Қариликка қарши дори” лойиҳасига Путиннинг яқин дўстларидан бири, Курчатов номидаги илмий-тадқиқот ядро институтини бошқараётган 77 ёшли Михаил Ковалчук раҳбарлик қилмоқда. Бундан ташқари, лойиҳада Путиннинг катта қизи, шифокор-эндокринолог Мария Воронцова ҳам иштирок этмоқда.
