“Ан-Насср” ва Португалия терма жамоаси ҳужумчиси Криштиану Роналду Саудия Арабистони чемпионати 6-туридан ўрин олган “Ал-Ҳазм”га қарши учрашувда рақиб дарвозасини ишғол қилиб, ўзининг профессионал фаолиятидаги 950-голига муаллифлик қилди.
Мазкур натижадан сўнг португалиялик футболчи ўз фикрлари билан ўртоқлашди:
“Одамлар, айниқса оилам, менга тез-тез шундай дейишади: ‘Етар энди, тўхтасанг ҳам бўлади. Сен аллақачон ҳаммасига эришдинг. Нега мингта гол урмоқчисан?’
Лекин мен бундай ўйламайман. Ҳали ҳам яхши ўйин кўрсатаяпман, клубимга ва терма жамоамга фойда келтиряпман. Нега шу руҳда давом этмаслигим керак?
Қанча вақт футбол ўйнашимни билмайман, аммо қолган йилларни завқ билан ўтказмоқчиман”, деди Роналду Canal 11 телеканалига берган интервьюсида.
Маълумот учун, Криштиану Роналду фаолияти давомида “Спортинг”, “Манчестер Юнайтед”, “Реал Мадрид” ҳамда “Ювентус” клублари шарафини ҳимоя қилган. Ҳозирда Саудия Арабистонининг “Ан-Насср” клубида тўп тепмоқда. Роналду Португалия терма жамоаси сафида Икки карра Миллатлар Лигаси ҳамда 2016-йилги Европа чемпионати ғолиблигини қўлга киритган. Ҳужумчи жорий мавсум “Ан-Насср” сафида 8 та учрашувда майдинга тушиб, 7 та гол ҳамда 2 голли узатма муаллифига айланган.
