АҚШнинг Миссисипи штатида яшовчи 24 ёшли ўқитувчи Миата Бордерс TikTok’да тарқалган видеода ўқувчисини “пакана” деб атаганидан сўнг биринчи иш кунидаёқ дарҳол ишдан бўшатилди. Бу ҳақда New york Post (NYP) нашри хабар бермоқда.
Ўзини “контент яратувчи” деб атаган Бордерс 17 октябрь куни эълон қилинган “ҳаётимдаги бир кун” видеосида ўзининг биринчи иш кунини тасвирлаган. 2,2 миллион мартадан ортиқ кўрилган видеода у мактабдаги тадбирни тасвирга олган ва ўқувчилардан бирига нисбатан “пакана” дея изоҳ берган.
Видео мактаб маъмурияти орасида тарқалгач, Бордерс билан ҳамкорлик тўхтатилди. У Kelly Services кадрлар агентлиги орқали ишлаган бўлиб, бундан буён мактаб округида ишлашга жалб қилинмайди. Округ вакиллари агентликни унинг DeSoto мактабларида ишлашига йўл қўйилмаслиги ҳақида хабардор қилишганини тасдиқлади.
Ўзини “қўлбола CEO” деб атайдиган аёл ишдан бўшатилгандан кейин видеодаги барча воқеалар унинг контент стратегиясининг бир қисми эканини ва кўрсатилганларнинг барчаси ҳақиқатга тўғри келмаслигини айтиб, ўзини жабрланган қурбондек кўрсатган.
Унинг айтишича, видеонинг аксарият қисми ўқувчилар йўқлигида суратга олинган ва у ўқувчиларни суратга олиш тақиқланганини билмаган. Бордерс “битта хато туфайли ҳамма нарсасини йўқотганини” қўшимча қилган.
TikTok фойдаланувчилари уни касб одобига зид иш тутгани ва вояга етмаганларнинг шахсий ҳаётига аралашгани учун танқид қилган.
