Трамп маъмурияти Россия иқтисодиётининг муҳим тармоқларига қарши қўшимча санкциялар тайёрлаган. Reuters’нинг маълум қилишича, улар президент Путин Украинадаги урушни якунлаш бўйича келишувга кўнмаган тақдирда кучга кириши мумкин.
Агентлик билан суҳбатлашган икки нафар АҚШ мулозимига кўра, Вашингтон Европа Иттифоқини Россиянинг музлатилган активларини мусодара қилиб, улар ҳисобидан Украина учун қурол-яроғ сотиб олишга чақирган. Шунингдек, Москванинг Қўшма Штатлардаги захираларидан фойдаланиш масаласи ҳам муҳокама этилган.
Бироқ Россияга қарши қўшимча санкциялар жорий этилиши ёки этилмаслиги номаълум. Трамп маъмурияти буни Кремлга нисбатан босимни кучайтириш учун “навбатдаги чоралар мажмуаси” сифатида кўраётган бўлиши мумкин.
Украина можароси — боши берк кўча
Тинчлик ўрнатувчи президент сифатида ном қозонишга астойдил уринаётган Трамп Украинадаги урушни тўхтатиш кутилганидан ҳам мураккаброқ эканини тан олди. Владимир Путин билан Аляскада ўтган учрашув натижа бермади. Будапешт мезбонлик қилиши кўзда тутилган навбатдаги юзма-юз мулоқот ҳам бекор қилинди.
Бир неча кун муқаддам Дональд Трамп Оқ уйга қайтганидан буён илк бор Россияга қарши санкциялар жорий қилди. Қўшма Штатларнинг Европадаги иттифоқчилари эса у Москвага нисбатан босимни янада оширишидан умидвор.
Мутахассисларнинг фикрича, Трамп Россияга қарши янги санкцияларни жорий қилишга шошилмаяпти. АҚШ президенти бир неча ҳафта кутиб, Россиянинг муносабатини кузатмоқчи.“Кейинги қадамни энди Европа ташлаши керак. Бу қўшимча санкциялар ёки тарифлар шаклида бўлиши мумкин”, деган АҚШ расмийси.
Нишонда нефть ва газ сектори
Қўшма Штатларнинг сўнгги санкциялари “Лукойл” ва “Роснефт” каби йирик нефть компанияларига қаратилган бўлиб, мазкур қадам “қора олтин” нархини 2 доллардан кўпроққа оширган. Натижада Хитой ва Ҳиндистон каби йирик харидорлар рус нефтига муқобил манбаларни излай бошлаган.
Оқ уй тайёрлаётган янги санкциялар Россия банк тизими ҳамда нефть экспорт инфратузилмасини қамраб олиши айтилмоқда.Си Цзиньпин билан учрашувда Хитойнинг Россия нефтини харид қилиш ҳажми муҳокама қилинади. Аммо Хитой импортни аллақачон сезиларли даражада қисқартирди, Ҳиндистон эса умуман тўхтатди”, деган АҚШ раҳбари журналистларга.
