“Манчестер Юнайтед” клуби келаси йил бир қанча футболчиларни сотиб олишни режалаштирмоқда. Бу ҳақда talkSPORT нашри хабар берди.
Манбага кўра, жамоа бош мураббийи Рубен Аморим марказий ярим ҳимоя чизиғини янада тезкор ва жисмонан кучли футболчилар билан мустаҳкамлашни истамоқда. Шу мақсадда “қизил иблислар” олти нафар футболчидан иборат номзодлар рўйхатини тузиб чиққан.
Манкунианликлар “шорт-листи”дан “Брайтон” футболчиси Карлос Балеба, “Ноттингем Форест” вакили Эллиот Андерсон, “Кристал Пэлас” ярим ҳимоячиси Адам Уортон, “Штутгарт” футболчиси Анхело Штиллер, Мадриднинг “Атлетико” клубида тўп сураётган Конор Галлаҳер ҳамда “Челси” футболчиси Андрей Сантос жой олган.
Қайд этилишича, клуб ёзда бир қанча етакчиларини, жумладан Бруну Фернандеш ва Кобби Майну каби футбоолчиларни сотиш вариантини ҳам кўриб чиқмоқда.
Аввалроқ “Манчестер Юнайтед” қишки трансфер ойнаси вақтида “Реал Мадрид”нинг бразилиялик ҳужумчиси Эндрикни ижарага олмоқчи эканлиги ҳақида хабарлар тарқалганди. Шунингдек, ҳимоячи Ҳарри Магуайр клуб билан янги шартнома имзолаш учун маошини камайтиришга тайёр эканлиги айтилганди
Маълумот учун, “Манчестер Юнайтед” Англия Премьер Лигаси 8-туридан кейин турнир жадвалида 13 очко билан 9-ўринни эгаллаб турибди.
