Буюк Британияда кўзи ожиз одамларнинг кўз нурини тиклаш мақсадида янги кашфиёт қилинди. Унда клиник синов ўтказилиб, одам сочидан ҳам юпқа бўлган электрон чип кўзи ожиз одамга ўрнатилди. Натижада 38 нафар кекса бемор қайта кўриш имконига эга бўлди.
Гап Prima номли 2 миллиметр ҳажмдаги микрочип ҳақида кетмоқда. У кўз тўр пардасининг марказига жойлаштирилади. Кўриш ва ёзишга ёрдам бериш учун беморларга кичик компьютерга уланган видеокамерадан иборат кенгайтирилган реаллик кўзойнаклари берилади, улар беморнинг белбоғига маҳкамланади. У ўқишни осонлаштириш учун катталаштириш функциясини ўз ичига олади. Кўзойнакдаги камера тасвирни чипга юборади, чип эса мияга сигналлар узатиб, кўриш ҳиссини қайта фаоллаштиради.
Клиник синов натижаларига кўра, беморларнинг 84 фоизи яна ўқишни бошлаган. Улар чипдан фойдаланган ҳолда ҳарфлар, рақамлар ва ёзувларни кўра олмоқда. Шифокорлар бу технологияни “кўриш тарихида янги давр” деб атамоқда.
Бу ёндашув айниқса қуруқ макуляр дегенерация касаллигидан азият чекаётганлар учун катта имконият яратади. Бу касалликда марказий кўриш аста-секин йўқолади. Ҳозиргача ушбу касалликнинг самарали давоси йўқ эди.
Микрочип имплантни ўрнатиш амалиёти икки соатдан камроқ вақт давом этади. Жараёндан кейин беморлар кўришни тиклаш учун бир қанча машғулотлардан ўтади. Бунда чипни ўрнатишнинг ўзи кифоя эмас – ундан фойдалана олиш учун машғулот ва мослашув зарур.
“Авваллари кўзимда иккита қора доира бор эди, ўқишнинг имкони йўқ эди. Энди яна ўқий оляпман – бу мен учун ажойиб ҳис”, деган синовда қатнашган беморлардан бири.
