Россия президенти Владимир Путин ва АҚШ раҳбари Дональд Трамп икки ҳафта ичида Венгрияда учрашиши мумкин. Болгария бунинг учун Путин учадиган самолётга ҳаво йўлагини тақдим этмоқчи. Бу ҳақда республика ташқи ишлар вазири Георг Георгиев Люксембургда бўлиб ўтган Халқаро ишлар бўйича кенгаш йиғилишида маълум қилди.
Болгария ТИВ раҳбари тўсиқсиз парвоз учун шароит яратиш мантиқий эканини таъкидлади, чунки бу Украинада “тинчликка эришиш”га қаратилганини айтди.
“Иштирокчилардан бири учрашувга кира олмаса, қандай қилиб учрашув ўтказилиши мумкин?”, дея таъкидлади вазир.
Руминия ҳозирча Россия самолётининг учиб ўтишига рухсат бериш бўйича расмий сўров олмаган. Парвоз билан боғлиқ вазият Европа Иттифоқининг амалдаги санксиялари туфайли мураккаблашган. Улар Россия давлат самолётларига, жумладан президентнинг Ил-96 самолётига Европанинг аксарият ҳудудлари устида парвоз қилишни тақиқлайди.
Бундан ташқари, 2023 йил март ойида Халқаро жиноий суд Путинга Украинадан болаларни депортация қилишда гумон қилинаётгани сабабли ҳибсга олиш ордерини чиқарган. Шу боис Рим статутини имзолаган давлатлар назарий жиҳатдан Путин самолётини мажбуран қўндириш имкониятини кўриб чиқиши мумкин.
Кремль Халқаро жиноий суд қарорини “ҳуқуқий жиҳатдан аҳамияциз” деб атаган, чунки Москва ХЖС юрисдикциясини тан олмайди. Путин ХЖСни “универсал характерга эга бўлмаган” ва “мустақил бўлмаган” “кам ҳурмат қилинадиган ташкилот” дея даъво қилди. У, шунингдек, суд кўрсатмасини осонгина четлаб ўтиш мумкинлигини, ҳукуматлараро битимни имзолаш кифоя қилишини таъкидлади.
АҚШ ва Россия раҳбарлари учрашуви
16 октябрь куни бўлиб ўтган телефон мулоқотидан сўнг Путин ва Трамп Будапештда учрашишга келишиб олди. АҚШ президенти Венгрия бош вазири Виктор Орбанни “яхши қабул қилувчи томон” деб атади. Кремль эса Венгрия “суверенитет ва ўз манфаатларини ҳимоя қилиш нуқтайи назаридан ўзининг алоҳида позицияси” билан ҳурматга сазовор эканини таъкидлади.
Трампнинг сўзларига кўра, унинг Путин билан учрашуви икки ҳафта ичида бўлиб ўтади. Россия президенти матбуот котиби Дмитрий Песков ҳам музокаралар “ҳақиқатан ҳам икки ҳафта ичида ёки бир оз кейинроқ бўлиб ўтиши мумкинлиги”ни истисно қилмади. Бунгача Россия ва АҚШ етакчилари август ойида Аляскада, Анкориждаги базада учрашган эди.
