Парижнинг Лувр музейидан ўғрилар 19 октябрь куни француз императорларига тегишли 9 та буюмни ўғирлаб кетди. Улардан бири ўғрилар томонидан қочиб кетаётганда ташлаб юборилган. Ўғрилик 4 дақиқа ичида содир этилган, жиноятчилар музей ходимлари формасида бинога кирган.
Франция ички ишлар вазири Лоран Нунес “бебаҳо қийматга эга” тақинчоқлар ўғирланганини тасдиқлаган. У тунаш чет элликлар томонидан содир этилганини инкор этмаган. Elle журнали ўғирланган тақинчоқлар ҳақида батафсил маълумот берди.
Ўғрилар музейда сақланган қимматбаҳо тақинчоқлар қийматидан бехабар бўлган бўлиши мумкин. Сабаби улар дунёдаги энг машҳур олмослардан бири — Regent (Қирол тожи олмоси)ни умуман эътиборсиз қолдирган. Бу олмос ўғрилик содир бўлган Аполлон галереясида сақланади ва 60 миллион евродан ортиққа баҳоланган.
“Мен бунга изоҳ бера олмайман. Фақат улар қўлга олингачгина, қандай буйруқ олганини ва нега айнан ўша витринани нишонга олмаганини биламиз”, деди терговни олиб бораётган француз прокурори Лоре Беккуа.
Тергов маълумотларига кўра, ниқобли ўғрилар 19 октябрь куни соат 09:30 атрофида қурилиш крани ёрдамида дераза ойналарини синдирган, сўнгра мотоциклларда Париж кўчалари бўйлаб қочиб кетган.
“Ўғрилар уларнинг жавоҳирларини бутун сақламоқчи эмас, уларни синдириб, қимматбаҳо метални эритишади, қимматбаҳо тошларни ажратиб олиб, далилларни яширади”, дейди Art Recovery International бош ижрочи директори Крис Маринелло
Унинг сўзларига кўра, Франция полицияси заргарлик буюмларини топиши учун 24 соатдан 48 соатгача вақт керак бўлади. Бундан кейин тақинчоқларнинг йўқ қилиниши эҳтимоли юқори.
“Улар бу вақтдан кейин жиноятчиларни қўлга тушириши мумкин, аммо жавоҳирларни қайтариб олишолмайди”, дейди у.
Луврдан ўғирланган буюмлар
- Императрица Евгения тожи
Наполеон III нинг рафиқаси императрица Евгениянинг тожи 1300 дан ортиқ олмос ва йирик зумрадлар билан безатилган. У олтин бургут нақшларга эга. Жиноятчилар қочиш чоғида уни шикастлаб қўйган, бироқ тож кейинчалик музей ташқарисида топилган.
- Императрица Евгения диадемаси
Бу ажойиб тож 212 та марварид, 1 998 та олмос ва 992 та пушти қиррали олмос билан безатилган. Испаниялик графиня сифатида туғилган Императрица Евгения Франция саройида таълим олган ва у ерда Наполеон Бонапартнинг эътиборини тортган. 1853-йилда Тюилри саройи ва Париж Нотр-Дам ибодатхонасида ўтказилган уларнинг тўйи императорлик дабдабасининг чўққиси бўлди.
Евгения Франциянинг сўнгги императрицаси эди. 1870-йилда империя қулаши билан, Евгения ўғли шаҳзода Луи-Наполеон билан бирга сургунга кетди ва кейинги ҳаётининг кўп қисмини Англияда ўтказди. Унинг кийиниш услуби ҳам, феъл-атвори ҳам марҳум қиролича Мария Антуанеттага тақлид қилинган.
- Императрица Евгениянинг олмосли бант-броши
Бу ялтираб турган бант 2 438 та олмос ва 196 та пушти қиррали олмос тошлардан иборат эди. Унинг осма ипли шакли Иккинчи империя давридаги ҳашамат рамзидир. Бант дастлаб 4 000 дона қимматбаҳо тош билан безатилган камар таркибига кирган, аммо асл камар тасвирлари сақланиб қолмаган.
- Императрица Евгениянинг ёдгорлик тўғноғичи
Олмос билан безатилган, муқаддас ёдгорликни сақлаш учун мўлжалланган реликвар тўғноғич Евгениянинг католик эътиқодига садоқатини эслатиб турувчи рамз бўлган.
- Сапфир комплекти: Тож, маржон ва сирғалар
Заргарлик буюмлари комплекти ХИХ аср саройларининг ажралмас белгиси бўлган. 1800-йилларнинг бошларига оид бу сапфир ва олмос тўпламини Луи Бонапартнинг рафиқаси қиролича Гортензия ҳам, Луи Филипп I нинг рафиқаси қиролича Мари-Амели ҳам таққан.
Тожда 24 та Сейлон сапфири ва 1 083 та олмос, маржонда эса олтин қобиқ ичида олмослар билан ўралган 8 та сапфир мавжуд. Тўпламдаги сирғалардан фақат биттаси ўғирланган, иккинчиси эса Луврда сақланиб қолган.
Асл комплект учта тўғноғич, тароқ ва иккита билагузукни ҳам ўз ичига олган. Улар музей томонидан “Париж заргарлик буюмларининг қимматли гувоҳи” деб таърифланган.
- Наполеон I нинг Франция императрицаси Мари-Луизага тўй совғаси
Бу тўплам император Наполеон I томонидан рафиқаси Мария-Луизага уйланиш маросими муносабати билан тақдим этилган. Унда зумрадлар ва олмослар билан безатилган нафис маржон, сирғалар ва билагузуклар мавжуд бўлган. Ушбу тўплам ўз даврида императорлик ҳашамати ва муҳаббат рамзи сифатида тан олинган.
1810-йилда император Наполеон I Австрия маликаси Мария-Луизага уйланган. У машҳур Мария-Антуанеттанинг жияни ва Муқаддас Рим императори Франц ИИънинг қизи эди. Наполеоннинг олдинги никоҳи — Жозефина де Богарне билан — кучли ҳис-туйғуларга бой бўлган, бироқ фарзандсиз якун топган. Мария-Луиза билан турмуш эса сиёсий иттифоқ бўлиб, императорга ворис — Наполеон II (кейинчалик Рим қироли)ни тақдим этди.
Наполеоннинг янги рафиқасига совға қилган заргарлик тўплами, 2004-йилда Лувр музейи томонидан қабул қилинган. Комплектга 32 та зумрад ва 1 138 та олмос, мураккаб ромб ва марварид шаклларда жойлаштирилган маржон ҳамда унга мос сирғалар киради. Императрица учун, шунингдек, опал ва олмослардан иборат иккинчи шунга ўхшаш тўплам ҳам ясалган. Франциянинг гўзаллик ва қудратга бўлган ҳайратини тарих давомида айнан шу императорлик тақинчоқлари ифодалаб келган.
