Перу президенти Хосе Жери мамлакатда содир бўлаётган норозилик намойишлари фонида 16 октябрь куни истеъфога чиқишдан бош тортди. Бу ҳақда AP News хабар берди.
Жери мамлакат барқарорлигини сақлаш ўзининг асосий вазифаси эканини айтиб, жиноятчиликка қарши курашиш учун парламентдан қўшимча ваколатлар сўрашини билдирган. Маълумотларга кўра, намойишлар вақтида жами 100 га яқин одам, жумладан, 80 нафар полициячи ва 10 нафар журналист жароҳат олган.
Намойишлар сентябрь ойида ёшлар бошчилигида пенсия ва маошлар оширилишини талаб қилиниб бошланган эди. Кейинчалик бу ҳаракат кенгайиб, ҳукуматдаги коррупция, жиноятчилик ва ислоҳот йўқлигидан чарчаган перуликлар норозилигига айланиб кетган. Намойиш вақтида 32 ёшли ҳип-ҳоп қўшиқчиси Eduardo Ruís ўқ ейиш оқибатида ҳалок бўлган. Прокуратура ҳодисани инсон ҳуқуқларининг жиддий бузилиши сифатида тергов қилмоқда.
Хосе Жери шу ойда собиқ президент Дина Болуарте ишдан олингачб ҳокимиятга келган эди. У илгари зўрлашда айбланиб, кейинроқ айбловдан озод этилган. Бироқ бу ҳолат, шунингдек, жиноятчиликка қарши курашни заифлаштирадиган қонунларга овоз бергани учун норозилик кучайиб кетган.
Ҳозирда намойишчилар Жери ва бошқа қонунчилар истеъфосини ҳамда баҳсли қонунларни бекор қилишни талаб қилмоқда. Норозиликлар чоғида полиция ва намойишчилар ўртасида тўқнашувлар юз бермоқда, кўздан ёш чиқарувчи газ ва резина ўқлари қўлланилмоқда.
