Саудия Арабистонининг “Ан-Насср” клуби ва Португалия терма жамоаси ҳужумчиси Криштиану Роналду 2026-йилги Жаҳон чемпионати саралаш босқичи доирасида Венгрияга қарши ўйинда дубль қайд этиб, ўзининг саралаш баҳсларидаги 40 ва 41-голларини урди.
Португалиялик ҳужумчи шу тариқа Гватемала терма жамоаси аъзоси Карлос Руиссани (39 гол) ортда қолдириб, Жаҳон чемпионати саралаш босқичларида энг кўп гол урган футболчига айланди. Рўйхатнинг учинчи поғонасида аргентиналик ҳужумчи Лионель Месси (36 гол) жой олган. Ундан кейин эронлик Али Дайи (35 гол) ва полшалик форвард Роберт Левандовски (33 гол) қайд этилган.
Маълумот учун, ҳозирда Португалия терма жамоаси ЖЧ саралашининг “Ф” гуруҳида 10 очко билан пешқадамлик қилмоқда. Жамоа энг яқин та’қибчи Венгрияни 5 очкога ортда қолдирмоқда.
Эслатиб ўтамиз, Криштиану Роналду Саудия Арабистонининг “Ан-Насср” жамоасида тўп сурмоқда. Унинг клуб билан тузган шартномаси 2027 йил ёзигача амал қилади. Transfermarkt портали футболчининг трансфер қийматини 12 миллион еврога баҳолаган.
