Россиядан Ўзбекистон, Қирғизистон ва Қозоғистонга газ етказиб бериш ҳажми саккиз ойда 15 фоизга ошди. Бу ҳақда “Газпром” раҳбари Алексей Миллер хабар берди.
Миллер Санкт-Петербург халқаро газ форумининг ялпи мажлисида шундай баёнот берди. У “Сибир кучи 2” лойиҳасини яқин келажакда Марказий Осиёга газ экспортини янада ошириш имконини берадиган асосий омиллардан бири деб атади.
“Ўзбекистон, Қирғизистон ва Қозоғистонда иқтисодиёт жуда тез суръатларда ўсаётганини таъкидлаб келмоқдамиз. Кейинги 5-6 йилга мўлжалланган прогнозларга кўра, бу мамлакатлар иқтисодиёти 60 фоизга ўсиши мумкин. Бу жуда юқори кўрсаткич бўлиб, қўшимча энергия истеъмолини, хусусан, газ истеъмолини ҳам талаб қилади”, деди Миллер.
“Газпром” раҳбари газ истеъмоли қандай ўсиб бораётганига аниқ мисол сифатида қуйидагиларни маълум қилди.
“Биз 2025-йилнинг 8 ойини ўтган йилнинг шу даври билан таққослаймиз. Марказий Осиёга, яъни Ўзбекистон, Қирғизистон ва Қозоғистонга Россия газини етказиб бериш ҳажми 15 фоизга ошди. Бу катта кўрсаткич. “Сибир кучи 2” мегалойиҳаси доирасидаги лойиҳалар ушбу минтақаларга газ етказиб беришнинг янада ўсишига туртки бўлади”, дея хулоса қилди Миллер.
