Афғонистонда икки кунлик узилишдан сўнг интернет тўлиқ тикланди. “Толибон” узилишга “кабел шикастланиши” сабаб бўлганини айтди. Бу ҳақда BBC хабар берди.
Манбаларга кўра, Афғонистон бош вазири Муҳаммад Ҳасан Охунд буйруғи билан интернет қайта тикланган. Уни ўчириш қарори эса “Толибон” олий етакчиси Ҳайбатуллоҳ Охундзода томонидан қабул қилинган. Бу корхоналар ва парвозлар фаолиятини издан чиқарган. Фавқулодда хизматлардан фойдаланиш имконияти ва аёлларнинг онлайн таълим олиши ҳам чекланган.
Интернет тиклангани ҳақидаги хабарлар “Толибон” бунга алоқаси борлигини рад этгач тарқалди. Жумладан, “Толибон” вакили Забиҳуллоҳ Мужоҳид оптик толали кабеллар алмаштирилаётганини айтди. У шу тариқа интернет узилишига ҳукуматнинг алоқадорлигини рад этди.
Афғонистонда интернетнинг узилиши
29 сентябрь куни мамлакат бўйлаб интернет бутунлай узилди. Дунё бўйлаб интернет эркинлигини кузатиб борувчи NetBlocks ташкилотига кўра, оптик толали интернетни ўчириш орқали “Толибон” мамлакатда янги ахлоқий чора-тадбирларни жорий этишни бошлаган. БМТнинг Афғонистондаги миссияси интернетга киришни тезкорлик билан тиклашга чақирди.
“Афғонистонда интернетга кириш имкониятининг чекланиши мамлакатни ташқи дунёдан бутунлай узиб қўйди. Бу афғон халқига жиддий зарар етказади. Шунингдек, интернетнинг узилиши иқтисодий барқарорликка таҳдид солиши ҳамда дунёдаги энг оғир гуманитар инқирозлардан бирини янада чуқурлаштириши мумкин”, дейилади БМТнинг баёнотида.
“Толибон” 2021 йилда АҚШ бошчилигидаги халқаро коалиция қўшинлари Афғонистондан чиқиб кетганидан сўнг мамлакатда ҳокимиятни эгаллади. Шундан бери улар аҳолига қарши тақиқлар жорий этиб келмоқда. Хусусан, аёллар ҳуқуқлари чеклаб қўйилди, қизларга таълим тақиқланиб, ҳаракатланиш эркинлигига тўсиқлар қўйилди, “зино” учун жамоат жойида жазолаш ва қатл этиш ҳолатлари кузатилди.
2025 йил июлида Халқаро жиноий суд “Толибон” олий етакчиси Ҳайбатуллоҳ Охундзода ва бош судья Абдул Ҳаким Ҳаққонийга қарши халқаро ҳибсга олиш ордери чиқарди. Улар инсониятга қарши жиноятларда, жумладан, аёлларни жинсига қараб та’қиб қилишда айбланмоқда.
