Россиядаги Чехия виза марказлари ариза қабул қилишни тўхтатди. Бу ҳақда виза оператори VFS’нинг сайтида хабар берилди.
Манбага кўра, 29 сентябрь виза марказлари ариза қабул қилган сўнгги кун бўлган. Олдин топширилган аризалар кўриб чиқилгач, марказларнинг фаолияти бутунлай тўхтатилади.
Эндиликда россияликлар Чехия визасини олишни истаса, тўғридан-тўғри элчихонага мурожаат қилишларига тўғри келади.
Россиянинг Украинага кенг кўламли босқини бошланганидан бери Чехия россияликлар учун виза бўйича қаттиқ чекловлар жорий қилган. Чехия русларга умуман туристик виза бермайди. Бундан ташқари, Шенген визаси билан боғлиқ чекловлар ҳам мавжуд.
Уруш бошланганидан кейин Чехия Санкт-Петербург ва Екатеринбургдаги консулликларни ёпди. Шунингдек, Чехия ҳукумати талаби билан Россиянинг Брно ва Карлови Варидаги консулликлари ҳам фаолиятини тўхтатди.
