Ғазо шаҳридаги инкубаторларда ётган камида 25 нафар касал ёки чала туғилган чақалоқни зудлик билан эвакуация қилиш лозим. Бу ҳақда БМТнинг UNICEF болалар хайрия ташкилоти хабар берди.
Тегишли чақириқ Исроил қуруқликдаги ҳужумини кучайтириши, тунда Ал Ҳело касалхонасини ўққа тутиши ортидан янгради. Касалхона атрофидаги ҳудудни танклар ўраб олган, у ерда камида 12 нафар чақалоқ инкубаторда сақланмоқда. Ҳужум оқибатида касалхона хоналари ва каравотларга шикаст етган.
“Уларни кўчириш вақти келди, чунки Ғазо шаҳри яна уруш майдонига айланди. Аммо қаерга кўчириш мумкин? Улар учун хавфсиз жой йўқ”, деди UNICEF вакили Рикардо Пирес.
Чақалоқларнинг кўпчилиги янги туғилган, эвакуация қилиш учун уларни кўчма кислород таъминоти билан адёлларга ўраб, қўлбола аравачаларга жойлаштириш керак бўлади. Бироқ, бу жараёнда улар инфекцияга чалиниши, ҳарорат ўзгаришлари таъсирига учраши ёки таъминот тугаб қолиши мумкин.
“Уларни кўчириш ҳозирча энг яхши вариантдек кўринади... лекин бу жуда хавфли”, дейди Рикардо Пирес.
Қайси шифохоналар чақалоқларни қабул қила олиши аниқ эмас эди, чунки кўпчилиги ҳужумга учраган ва тўлиб кетган. Пирес август ойида Ғазо шаҳрида бўлган ва у ерда бошига ўқ тегиб вафот этган онанинг қорнидан олиб ташланган Наргес исмли чақалоқни кўрган.
“Биз нафақат ундан, балки бошқа барча чақалоқлардан ҳам жуда хавотирдамиз”, деди у.
Пирес отишмалардан сўнг қизнинг отаси ва шифокорлари билан боғланишга уринишлар натижасиз қолганини айтди. Ғазо шаҳрида инкубаторлардан кўра чақалоқлар кўпроқ, уларнинг баъзилари битта инкубаторга жойлаштирилган.
Пирес Исроил қўшимча инкубаторлар олиб киришга рухсат бермаганини айтди. У ўтган ойда битта инкубаторда тўртта чақалоқни кўрганини таъкидлади.
