Польша ҳукумати 25 сентябрь куни Беларусь билан ёпилган чегарани қайта очади. Бу ҳақда бош вазир Дональд Туск ҳукумат йиғилишида маълум қилди.
Польша 12 сентябрь куни Беларусь ва Россия ўтказган кенг кўламли ҳарбий машғулотлар — “Запад 2025”га жавобан чегарадаги барча ўтиш пунктларини ёпганди. Ушбу машғулотлар Россия дронларининг Польша ҳаво ҳудудини бузиши ортидан НАТО мамлакатларининг хавотирини кучайтирган эди.
“Ҳарбий машқлар якунлангани хавфларни камайтирди. Шу боис, иқтисодий манфаатлар, хусусан, юк ташувчилар ва темир йўл соҳасини ҳисобга олиб, чегарани очишга қарор қилдик”, деди Туск.
Унга кўра, вазият кескинлашса, Польша тегишли чораларни кўришдан тортинмайди. Ички ишлар вазирлиги автомобиль ва темир йўл ўтиш пунктларини очиш бўйича ҳужжат тайёрлайди. Польша 2021-йилдан буён Беларусь билан автомобиль қатновини сезиларли даражада чеклаб келмоқда. Минск миграцион босимда айбланиб, чегара ҳудудларида қўшин жойлаштирилган ва замонавий тўсиқлар ўрнатилган.
