Беларусь ва Украина ўртасидаги чегарада вазият мисли кўрилмаган даражада кескинлашди. Бу ҳақда Беларусь президенти Александр Лукашенко маълум қилди.
“Жанубий чегара — бир ярим минг километрлик ҳудуд ҳар қачонгидан ҳам қаттиқ ёнмоқда. Баъзи ҳарбийларга жавобим шундай: биз жанубий чегарани кучайтирилган тартибда ҳимоя қилишимиз керакми ёки йўқми? Жавоб: ҳа, керак. Биз ҳарбиймиз, халқ эса биз уларни ҳимоя қилишимиз учун ўз ҳисобидан боқмоқда”, деди у.
“РИА Новости”нинг ёзишича, 17 июнь куни Украина Қуролли кучлари Брянск вилоятида ичида болалар бўлган автобусга зарба берган. Автобус Беларусдан Геленжик шаҳрига кетаётган бўлган. Автобус ичида жами 44 нафар йўловчи бор эди. Уларнинг 28 нафари Речица шаҳридаги 2-сонли ёшлар спорт мактаби ўқувчилари бўлган. Ҳужум оқибатида болаларга ҳамроҳлик қилаётган бир аёл ҳалок бўлиб, саккиз киши жароҳатланган.
Лукашенко бу воқеани очиқчасига фашизм деб атади ва Киевдан жавоб кутаётганини айтди. Унинг таъкидлашича, бу теракт кимнингдир Минскнинг хотиржамлигидан норози бўлгани сабабли содир этилган. Беларусь президенти провокациялар ва мамлакатни урушга тортиш уринишлари ёмон оқибатларга олиб келиши мумкинлигидан огоҳлантирди.
У ҳужум бўйича тергов ишларини Россия расмийлари назорат қилишини буюрди. Шунингдек, Лукашенко ҳукумат рухсати ва назоратисиз болалар гуруҳларининг узоққа саёҳат қилишини тақиқлаш ҳақида кўрсатма берди.
Лукашенко май ойида ҳар икки томонлама муаммоларни ҳал қилиш учун Украина президенти Владимир Зеленский билан учрашишга тайёр эканини айтган эди. Унга кўра, Беларусга нисбатан тажовуз бўлмаса, у Украинага қарши ҳарбий ҳаракатларга аралашмайди. Аммо мамлакат Россия билан чегарани биргаликда ҳимоя қилади.
