UFC’нинг икки карра собиқ чемпиони, 37 ёшли ирландиялик MMA устаси Конор Макгрегор навбатдаги жангини америкалик Майкл Чендлерга қарши ўтказишини тасдиқлади. Бу ҳақда Конор Fox News телеканалига берган интервьюсида маълум қилди.
Макгрегорнинг сўзларига кўра, жанг 2026 йил июнь ойи охирида АҚШ президенти расмий қароргоҳи — Оқ уй ҳудудида бўлиб ўтадиган UFC турнирида ташкил қилинади.
Мен жангга тайёрман. Майкл Чендлер билан тўқнаш келаман. Биз бирга The Ultimate Fighter реалити-шоусида иштирок этганмиз. У яхши йигит, деди Макгрегор.
Қайд этиш жоиз, Конор Макгрегор охирги марта 2021-йилнинг июль ойида америкалик Дастин Порьега қарши жанг қилган ва биринчи раундда оёғидан олган жароҳат сабабли техник нокаутга учраган эди. Ирландиялик спортчи карьераси давомида 22 ғалаба ва 6 мағлубият қайд этган. У UFC тарихида илк бор икки вазн тоифасида чемпионликни қўлга киритган спортчи сифатида ном қозонган.
